Zvicër: Aargau shpall gjendje emergjente për azilin në Zvicër?

Kantoni Aargau është aktualisht i vetmi në Zvicër që ka shpallur zyrtarisht gjendje emergjente për azilin, pavarësisht se edhe shumë kantone të tjera përballen me presion të madh nga rritja e numrit të azilkërkuesve.

Sipas raportimeve të SRF, autoritetet në Aargau paralajmërojnë prej vitesh se sistemi i azilit është në kufijtë e kapaciteteve, transmeton albinfo.ch.
Aktualisht, në këtë kanton janë të strehuar mbi 10 mijë azilkërkues, ndërsa gjendja emergjente është në fuqi që nga viti 2023.

Edhe pse situata është e tensionuar në gjithë vendin, kapacitetet nuk janë të shpërndara në mënyrë të barabartë. Në rreth dy të tretat e kantoneve kapacitetet janë pothuajse të mbushura, ndërsa një pjesë tjetër ka ende hapësira rezervë, çka bën që presioni të mos jetë i njëjtë kudo.

Në rastin e Aargaut, kombinimi i mungesës së kapaciteteve, presionit të vazhdueshëm dhe planifikimit më të dobët krahasuar me kantone të tjera ka detyruar autoritetet të shpallin gjendje emergjente. Kjo u jep atyre kompetenca shtesë për të marrë masa të shpejta, si përdorimi i bunkerëve dhe objekteve të tjera për strehim.

Ndërsa Zvicra vazhdon të përballet me rritjen e numrit të azilkërkuesve, rasti i Aargaut tregon se menaxhimi lokal dhe planifikimi afatgjatë mbeten faktorë vendimtarë në përballimin e krizave të tilla.

/albinfo