Toka nuk përballon më rritjen e popullsisë !?

Shkencëtarët paralajmërojnë se Toka mund të mos jetë në gjendje të përballojë pafundësisht rritjen e popullsisë globale, e cila tashmë ka kaluar 8.3 miliardë banorë. Një studim i fundit i udhëhequr nga kërkues të Universitetit Flinders tregon se kufijtë natyrorë të planetit janë tejkaluar prej dekadash dhe se pasojat po bëhen gjithnjë e më të dukshme.

Studiuesit analizuan të dhëna historike që nga viti 1000 pas Krishtit, duke evidentuar se për shumë shekuj ekzistonte një ekuilibër relativ midis rritjes së popullsisë dhe burimeve natyrore.

Sipas studimit, ky ekuilibër u prish pas viteve 1950, kur rritja e popullsisë dhe konsumit u përshpejtua ndjeshëm. Që nga vitet 1960, studiuesit flasin për një “fazë negative demografike”, ku rritja e numrit të njerëzve nuk shoqërohet më me rritje të qëndrueshme të burimeve. Një rol kyç në këtë proces kanë luajtur lëndët djegëse fosile, të cilat kanë mundësuar rritje të prodhimit ushqimor dhe industrial, duke krijuar një iluzion zhvillimi të pakufizuar. Megjithatë, kjo sipas ekspertëve është vetëm një zgjidhje e përkohshme që shtyn problemin në kohë.

Megjithëse parashikohet që popullsia globale të arrijë kulmin në rreth 11.7 deri në 12.4 miliardë banorë në dekadat e ardhshme, debatet mbi kapacitetin real të Tokës vazhdojnë. Disa shkencëtarë besojnë se me menaxhim më të mirë të burimeve mund të përballohet një popullsi më e madhe, por theksi kryesor mbetet tek ndryshimi i modelit të konsumit. Ekspertët nënvizojnë se e ardhmja e njerëzimit varet nga mënyra se si do të përdoren energjia, uji dhe toka, si dhe nga vendimet që do të merren për të mbrojtur ekosistemet jetike të planetit.

/joq