Nëse humb Orbani, Gruevski mund të shfaqet në kufi në stilin e Grubit?

Për ne, që mbetemi një fusnotë në politikën rajonale, ndikimi është i kufizuar – përveç një pyetjeje: nëse humb Orbani, a mund të shfaqet Gruevski në kufi, sipas stilit “ja ku jam” të Artan Grubit?

Ndërkohë që vëmendja është te lufta në Iran, në rajon po zhvillohet një nga ngjarjet më të rëndësishme politike të dy dekadave të fundit – zgjedhjet në Hungari. Pas dominimit të gjatë të Viktor Orban dhe Fidesz, opozita (Tisa) kryeson në sondazhe, por rezultati mbetet i pasigurt për shkak të sistemit zgjedhor që favorizon partitë e mëdha.

Megjithëse Tisa ka epërsi të qartë në sondazhe, shpërndarja e votave në njësi zgjedhore mund t’i japë avantazh Fidesz-it. Zonat rurale dhe struktura demografike vazhdojnë të mbështesin pushtetin.

Hungaria është thellësisht e ndarë: Budapesti dhe qytetet e mëdha anojnë nga opozita, ndërsa zonat rurale mbeten bastion i Fidesz. Edhe ndarja gjeneracionale është e fortë – të rinjtë kërkojnë ndryshim, të moshuarit stabilitet.

Skenari më i mundshëm është një fitore e ngushtë e Tisa-s, por nuk përjashtohen as një ngërç politik apo rikthimi i Fidesz-it.

Këto zgjedhje janë një referendum për drejtimin e Hungarisë dhe kanë pasoja për rajonin. Një ndryshim pushteti do të sillte një qasje më pro-evropiane dhe më pak mbështetje për regjime problematike në rajon, si Serbia. Për ne, ndikimi mbetet simbolik – përveç nëse ndodh ndonjë surprizë politike me pasoja të brendshme.

/ms