Ahmeti: Shqipja nuk negociohet! Kasami: Opozita ka pasur 20 vjet kohë për të zgjidhur problemet?

Kreu i BDI-së, Ali Ahmeti, përmes një letre të hapur ka reaguar ndaj debateve për statusin e gjuhës shqipe, duke theksuar se ajo është e drejtë kushtetuese dhe jo çështje negociimi. Ai nënvizon se Marrëveshja e Ohrit mbetet themel i shtetit dhe çdo përpjekje për ta vënë në pikëpyetje cenon të ardhmen e vendit. Ahmeti paralajmëron se çdo tentativë për të relativizuar apo kufizuar përdorimin e shqipes rrezikon stabilitetin dhe besimin ndërmjet komuniteteve. Sipas tij, barazia gjuhësore është shtyllë e bashkëjetesës dhe nuk dobëson, por forcon shtetin.

“Kthim pas nuk ka! Të drejtat e fituara nuk negociohen dhe nuk zhbëhen. Çdo tentativë për të kufizuar zbatimin e gjuhës shqipe është regres i rrezikshëm. Dhe ata që sot flasin për kufizime duhet ta dinë se po hapin plagë që ky vend i ka mbyllur me shumë sakrifica. Me këto çështje nuk luhet. Këto të drejta nuk janë vetëm arritje e brendshme, ato janë rezultat i një rruge të përbashkët me partnerët tanë strategjikë, Bashkimin Evropian, Shtetet e Bashkuara dhe NATO-n. Prandaj, mbrojtja e tyre nuk është vetëm detyrim politik, por përgjegjësi shtetërore dhe ndërkombëtare”, tha Ali Ahmeti, kryetar i BDI-së.

Nga ana tjetër për Bilall Kasami tha se opozita ka pasur 20 vjet kohë për të zgjidhur problemet që i ka lënë trashëgimi. Ai garanton se ligji për gjuhët, gjuha shqipe dhe të drejtat e shqiptarëve dhe komuniteteve të tjera në Maqedoni nuk do të cënohen.

“Unë nuk do të kisha dashur të komentoj deklaratat në këtë rast të një partie opozitare, sepse e njëjta ka pasur 20 vjet që t’i zgjidhë këto probleme të cilat na i ka lënë sot në trashëgimi. Por ajo që mund të them është se as ligji për gjuhët, as gjuha shqipe dhe as një e drejtë e siguruar e shqiptarëve dhe komuniteteve tjera në Maqedoni në asnjë mënyrë nuk do të cënohet, dhe për këtë garanton kjo qeveri”, tha Bilall Kasami, VLEN.

Ndërkaq, disa ditë më parë, Gjykata Kushtetuese publikoi mendimin e Komisionit të Venecias për Ligjin për Përdorimin e Gjuhëve, i cili thekson se shteti mund të garantojë të drejta më të gjera gjuhësore, por vetëm nëse sigurohen kushte reale për zbatimin e tyre, veçanërisht burime financiare dhe kapacitete administrative.

Komisioni i Vencias gjithashtu thotë se zbatimi praktik i ligjit është po aq i rëndësishëm sa edhe vetë përmbajtja e tij, duke theksuar se të drejtat gjuhësore janë efektive vetëm nëse përdoren në jetën publike.

Rasti në Gjykatën Kushtetuese lidhet me vlerësimin e kushtetutshmërisë së Ligjit për Gjuhët, pas ankesave nga disa nisma që nga viti 2019, por që u riaktivizua në vitin 2024, duke shkaktuar tensione politike dhe reagime publike. Vendimi përfundimtar pritet të përcaktojë nëse ligji do të shfuqizohet plotësisht apo pjesërisht.

/tv21