Ass. Dr. Teuta Dalipi: 2 Prilli rikujton rëndësinë e pranimit dhe përfshirjes

Sot, më 2 prill, në mbarë botën shënohet Dita Botërore e Ndërgjegjësimit për Autizmin, një ditë e dedikuar rritjes së ndërgjegjësimit dhe promovimit të pranimit për personat në spektrin e autizmit.

Me këtë rast, Teuta Dalipi, specialiste neurologe nga Klinika e Neurologjisë në Shkup, apelon për më shumë vëmendje institucionale dhe shoqërore ndaj kësaj kategorie, duke theksuar se përfshirja dhe mbështetja janë thelbësore për zhvillimin dhe mirëqenien e tyre.

Ajo nënvizon se kjo ditë duhet të shërbejë si një moment reflektimi për shoqërinë, në drejtim të rritjes së mirëkuptimit dhe respektimit të dallimeve. Personat me autizëm shpesh përballen me paragjykime dhe barriera, pavarësisht potencialit dhe aftësive të tyre unike.

Sipas saj, institucionet, familjet dhe komuniteti kanë rol kyç në ndërtimin e një ambienti gjithëpërfshirës, ku çdo individ ndjehet i pranuar dhe i vlerësuar. Përfshirja në arsim, punësim dhe jetën shoqërore mbetet një ndër sfidat kryesore që kërkon angazhim të vazhdueshëm.

Mesazhi i kësaj dite është i qartë: një shoqëri më e drejtë dhe më humane ndërtohet kur dallimet pranohen dhe vlerësohen si pasuri e përbashkët.

/ts