Shkurtimi i dy paraleleve në shqip në SHMK “Drita” – goditje ndaj arsimit shqiptar në Kërçovë ?

REAGIM PUBLIK
Në cilësinë e këshilltarit komunal në Komunën e Kërçovës, shpreh shqetësimin tim të thellë për shkurtimin e dy paraleleve në gjuhën shqipe në SHMK “Drita” në Kërçovë, një në drejtimin e gjimnazit dhe një në drejtimin profesional të makinerisë (teknik i makinerisë).

Ky vendim cenon drejtpërdrejt të drejtën e nxënësve shqiptarë për arsimim në gjuhën amtare. Duke pasur parasysh interesimin e lartë për këto drejtime, shtrohet një pyetje thelbësore: ku do të regjistrohen nxënësit që mbesin jashtë, kur në Komunën e Kërçovës funksionon vetëm një gjimnaz me mësim në gjuhën shqipe?

Po aq shqetësues është edhe ndikimi i këtij vendimi mbi stafin arsimor. Sa mësimdhënës rrezikojnë vendet e tyre të punës dhe a është realizuar një analizë e mirëfilltë mbi pasojat në sistemin arsimor lokal të komunës së Kërçovës?
Mbetet e paqartë gjithashtu mbi çfarë baze është marrë vendimi për publikimin e Konkursit nga Ministria e Arsimit dhe Shkencës për vitin shkollor 2026/2027, me dy paralele më pak krahasuar me vitin shkollor aktual.

Ndërkohë që mbështes proceset e optimizimit në arsim, ato duhet të realizohen në mënyrë të drejtë, të planifikuar dhe pa cenuar interesin e nxënësve, veçanërisht jo në fazën fillestare të regjistrimit.
Propozimi ynë është i qartë: çdo ndryshim duhet të bazohet në transparencë të plotë, arsyetim të qëndrueshëm dhe në të dhëna reale. Nuk duhet të ketë shkurtim të paraleleve aty ku ekziston kërkesë e dëshmuar.

I bëj thirrje Ministrisë së Arsimit dhe Shkencës që të rishqyrtojë këtë vendim dhe të garantojë transparencë dhe drejtësi në proces.
Arsimi nuk është statistikë. Është e ardhmja jonë.
Me respekt,
Ilir Rushani

/tvgurra