Lufta dhe pasiguritë në Ballkan ?

“Po vjen së shpejti” dhe “Ju kemi dhënë paralajmërimet tona” ishin mesazhet e publikuara më 9 dhe 10 mars në Telegram nga kanali “HomeLand Justice”, një grup që ka marrë përgjegjësinë për disa sulme kibernetike ndaj institucioneve të Shqipërisë që nga viti 2022.

Sulmi më i fundit ndodhi të martën dhe kishte në shënjestër postën elektronike të Kuvendit të Shqipërisë. Kuvendi konfirmoi se synimi ishte fshirja e të dhënave dhe dëmtimi i sistemeve të brendshme. Autoriteti Kombëtar për Sigurinë Kibernetike (AKSK) tha se ka ngritur një grup pune për analizimin teknik të rastit, ndërsa ekipet po punojnë për rikuperimin e të dhënave.

Sipas një analize të Microsoft, “HomeLand Justice” lidhet me Qeverinë iraniane. Grupi pretendon se sulmet janë hakmarrje për strehimin në Shqipëri të opozitës iraniane MEK dhe paralajmëron se sulmi është “vetëm maja e ajsbergut”.

Ekspertët paralajmërojnë se tensionet mes SHBA-së dhe Iranit mund të rrisin rrezikun e sulmeve kibernetike dhe operacioneve të fshehta edhe jashtë zonave tradicionale të konfliktit.

Sipas ekspertit të sigurisë Mentor Vrajolli, orientimi i qartë i Shqipërisë dhe Kosovës drejt aleatëve perëndimorë mund t’i bëjë ato objektiva të veprimeve indirekte armiqësore, edhe pse ndikimi i drejtpërdrejtë iranian në rajon mbetet i kufizuar. Megjithatë, sulmet kibernetike mbeten një rrezik real dhe kërkojnë vigjilencë të lartë institucionale.

Në Kosovë, pas nisjes së luftës në Iran, kryeministri Albin Kurti mblodhi Këshillin e Sigurisë dhe ritheksoi mbështetjen për SHBA-në dhe aleatët perëndimorë, duke thënë se institucionet po monitorojnë nga afër situatën dhe implikimet e mundshme për vendin.

/rel