Rritje masive e biletave nga Aeroporti i Baselit !?

Biletat e fluturimeve të kompanisë ajrore easyJet nga EuroAirport Basel-Mulhouse-Freiburg janë rritur ndjeshëm për muajt prill dhe maj, duke arritur në disa raste deri në 1,682 për qind më shumë se çmimet e zakonshme, përcjell albinfo.ch.

Sipas raportimeve, udhëtarët që rezervojnë bileta për këtë periudhë po përballen me çmime shumë më të larta, ndonëse kompania njihet si një linjë ajrore me kosto të ulët.

Arsyeja kryesore lidhet me punimet që do të zhvillohen në pistën kryesore të aeroportit nga 15 prilli deri më 20 maj. Gjatë kësaj kohe, pista do të jetë në renovim, duke bërë që rreth 25 kompani ajrore që operojnë zakonisht nga ky aeroport të pezullojnë përkohësisht fluturimet e tyre.

Si pasojë, vetëm easyJet do të vazhdojë të operojë në disa destinacione të përzgjedhura, duke përdorur pistën dytësore më të shkurtër të aeroportit.
Kjo situatë krijon një lloj monopoli të përkohshëm për kompaninë gjatë kësaj periudhe pesëjavore, pasi nuk do të ketë konkurrencë nga linjat e tjera ajrore.

Megjithatë, kompania ka theksuar se rritja e çmimeve nuk lidhet vetëm me mungesën e konkurrencës. Sipas saj, një faktor tjetër është investimi në trajnim të specializuar për pilotët, i përshtatur posaçërisht për operimin e fluturimeve në pistën dytësore të aeroportit.

/albinfo