Vuçiç: Mund të përdoret bomba bërthamore

Presidenti i Serbisë, Aleksandar Vuçiç, deklaroi se “jetojmë në një kohë ndryshimesh tektonike” që kërkojnë seriozitet dhe përkushtim, duke theksuar se situata botërore do të bëhet edhe më e ndërlikuar, duke paralajmëruar se, sipas mendimit të tij, konfliktet globale mund të përfundojnë me përdorimin e armëve bërthamore.

“Bota po ndryshon dhe para nesh janë sfida serioze. Pres që konfliktet të përshkallëzohen dhe besoj se në fund do të rezultojnë me përdorimin e armëve bërthamore. Jo sepse e dua, por sepse po përballemi me probleme të thella, strukturore dhe ekonomike që do të çojnë në pasoja katastrofike”, tha Vuçiç në një miting parazgjedhor.

Presidenti serb paralajmëroi për tensionet në rritje në botë, veçanërisht në lidhje me Lindjen e Mesme, dhe theksoi se kjo mund të çojë në konflikte serioze. Ai gjithashtu kujtoi ndryshimet shqetësuese ekonomike globale, përfshirë rritjen e çmimeve të naftës.

Vuçiç gjithashtu u bëri thirrje qytetarëve të jenë të kujdesshëm dhe të përgjegjshëm, duke theksuar se Serbia duhet të ruajë paqen dhe stabilitetin. “Duhet të mbrojmë vendin tonë, fëmijët tanë dhe familjet tona. Askush nuk mund të garantojë se bota do të mbetet e qetë, madje as ata që tani mendojnë se janë në siguri”, tha Vuçiç, duke theksuar se Serbia duhet të mbetet neutrale dhe e pavarur në përballjen me sfidat globale.

/ts