Një gabim i vetëm mund të shkaktojë luftën e tretë botërore?

Rreziku i një Lufte të Tretë Botërore po bëhet gjithnjë e më i dukshëm, ka paralajmëruar një studiuese e NATO-s, ndërsa tensionet në Lindjen e Mesme vazhdojnë të përshkallëzohen pas sulmeve të SHBA-së dhe Izraelit ndaj Iranit.
Florence Gaub, drejtuese e kërkimeve në NATO Defense College, deklaroi në një intervistë për gazetën spanjolle El País se një konflikt global mund të shpërthejë edhe pa qenë qëllimi i drejtpërdrejtë i askujt.

Sipas saj, luftërat e mëdha nuk fillojnë domosdoshmërisht nga një vendim i vetëm për të “shtypur butonin e luftës”, por mund të lindin nga një seri gabimesh ose përshkallëzimesh të pakontrolluara.
“Një aksident, një keqinterpretim, një përshkallëzim verbal apo vendime të marra nën presion mund të çojnë në kalimin e një vije që askush nuk kishte ndërmend ta kalonte”, u shpreh ajo.

Gaub theksoi se për këtë arsye investimi në mbrojtje është po aq i rëndësishëm sa edhe diplomacia, pasi të dyja shërbejnë për të parandaluar përshkallëzimin e konflikteve.
Duke folur për situatën në Lindjen e Mesme, ajo tha se përplasja mes Iranit dhe kundërshtarëve të tij nuk është diçka e papritur, pasi tensionet lidhen me programin bërthamor iranian që prej fillimit të viteve 2000.

Ndërkohë, përplasjet në rajon janë intensifikuar pas sulmeve të fundit ushtarake ndaj Iranit dhe kundërpërgjigjeve të Teheranit me raketa dhe dronë ndaj objektivave në disa vende të Lindjes së Mesme. Sipas autoriteteve iraniane, qindra persona kanë humbur jetën nga sulmet, ndërsa situata mbetet tepër e tensionuar.

/joq