Pse dy shtete muslimane nisën luft në mes Ramazanit ?

Operacioni i fundit i Pakistanit erdhi pasi forcat afgane sulmuan dje në mbrëmje trupat kufitare pakistaneze, për shkak të sulmeve të mëparshme ajrore nga Islamabadi, dhe pas disa muajsh përleshjesh kufitare, sipas “Euronews”.
Pakistani nisi sot sulmet në qytetet kryesore në Afganistan, përfshirë kryeqytetin Kabul, pasi ministri i Mbrojtjes tha se vendit të tij i kishte mbaruar “durimi” dhe mendonte se tani ekzistonte një “luftë e hapur”.

Kjo deklaratë vjen pasi forcat afgane sulmuan trupat kufitare pakistaneze dje në mbrëmje në hakmarrje të sulmeve ajrore vdekjeprurëse pakistaneze, në zonat kufitare afgane të dielën.

“Pakistani ka shpresuar për paqe në Afganistan pas tërheqjes së forcave të NATO-s dhe priste që talebanët të përqendroheshin në mirëqenien e popullit afgan dhe stabilitetin rajonal. Në vend të kësaj, talebanët e kanë shndërruar Afganistanin “në një koloni të Indisë”, duke mbledhur militantë nga e gjithë bota dhe filluar të “eksportojnë terrorizëm”, tha sot ministri i Mbrojtjes Khawaja Mohammad Asif në një postim.

Pakistani ka akuzuar shpesh Indinë fqinje për mbështetjen e Ushtrisë Çlirimtare të Baluçëve të jashtëligjshme dhe talebanët pakistanezë, akuza që Nju Delhi i ka mohuar.
Marrëdhëniet midis fqinjëve janë përkeqësuar në muajt e fundit, me kalimet kufitare tokësore të mbyllura kryesisht që nga luftimet vdekjeprurëse në tetor që vranë më shumë se 70 persona nga të dyja palët.

Islamabadi akuzon Afganistanin se nuk ka vepruar kundër grupeve militante që kryejnë sulme në Pakistan, gjë që qeveria talebane e ka mohuar.
Disa raunde negociatash pasuan një armëpushim fillestar të ndërmjetësuar nga Katari dhe Turqia, por përpjekjet nuk kanë arritur të prodhojnë një marrëveshje të qëndrueshme.

Të dy ushtritë thanë se vranë dhjetëra ushtarë në raundin e fundit të dhunës kufitare, e cila pasoi sulme të shumta pakistaneze në Afganistan dhe përleshje përgjatë kufirit në muajt e fundit.

/oranews