Opozita në hall pa komuna e pa lider, Ahmeti apo Taravari si mendoni ?

Zgjedhjet lokale të fundit në vend nuk zgjodhën vetëm kryetarët e rinj të komunave, por hapën edhe një krizë më të thellë identitare krizën e lidershipit në kampin opozitar. Opozita shqiptare sot nuk është vetëm pa komuna, por edhe pa një bosht të qartë politik rreth të cilit duhej të artikulojë alternativën ndaj pushtetit. Pyetja që shtrohet natyrshëm është kush është lideri i opozitës sot Ali Ahmeti apo Arben Taravari? E kjo pyetje merr kuptim më shumë pas deklaratës së mbrëmshme të Taravarit i cili tha se Gostivari është epiqendra e opozitës, shkruan Zhurnal.

Nëse Gostivari mbetet epiqendra e opozitës kush po mbetet lider i opozitës?
Rezultatet zgjedhore e konfirmuan gjendjen e vështirë të opozitës në të cilën ndodhet, e kjo nuk është aspak e shëndetshme për demokracinë. Humbja e komunave nuk ishte thjesht një disfatë zgjedhore, por një goditje serioze për legjitimitetin politik të opozitës. Në vend se zgjedhjet të shërbenin si trampolinë për riorganizim dhe rikthim, ato prodhuan një realitet të ri, ku opozita mbeti pa pushtet lokal dhe pa një figurë të qartë udhëheqëse.

Në këtë vakum apo boshllëk politik, deklarata e Arben Taravarit se “epiqendra është në Gostivar” nuk ishte e rastësishme. Ajo erdhi në një moment simbolik natën e festës pas fitores së kandidatit të ASH-së, Valbon Limani, në Gostivar. Me këtë deklaratë, Taravari dërgoi sinjale të qarta se ambicia e tij nuk ndalet vetëm në suksesin lokal, por synon ta pozicionojë veten si figurë qendrore e opozitës shqiptare.

Gostivari, si bastion i fitores së ASH-së, u shndërrua në argument politik për Taravarin aty ku fitohet, aty ndërtohet edhe lidershipi. Por kjo qasje ngrit një dilemë thelbësore a mjafton një komunë për të shpallur epiqendrën e opozitës? Apo lidershipi kërkon më shumë se kaq bie fjala vizion, unitet dhe kapacitet për të bashkuar një opozitë të fragmentuar në më shumë pjesë? Nuk duhet t’i lëmë anash edhe ASH-në e Selës dhe PDSH-në e Thaçit.

Ahmeti apo Taravari?
Kjo mbase do të ishte pyetje për një milionë euro, por që nuk do mend se për shkurt kohë do të kuptohet përgjigja. Ahmeti nuk lëshon pe në çështjen e udhëheqjes e Taravari njihet për labilitetin politik që gjatë karrierës së tij ka bërë lëvizje të shumta duke ndryshuar kampet brenda një periudhe të shkurtë kohore.

Debati Ahmeti apo Taravari, në thelb nuk është vetëm debat për emra por për modelin e lidershipit. Taravari përfaqëson një qasje më lokale, ndërsa Ahmeti është e kundërta e Taravarit, siç e ka potencuar vet ky i fundit disa herë që është lider i dalë nga malet dhe jo nga ekranet televizive. Në këtë kontekst, opozita rrezikon të mbetet peng i këtij krahasimi nëse nuk arrin të ndërtojë një projekt politik që shkon përtej individëve.

Nëse opozita vazhdon të jetë pa komuna dhe pa një lider të pranuar gjerësisht, atëherë rrezikon të mbetet thjesht spektatore e zhvillimeve politike. Fitorja në Gostivar mund të jetë një fillim, por nuk është fundi i betejës. Lidershipi i opozitës nuk shpallet me deklarata festive, por ndërtohet me konsistencë, bashkim dhe besueshmëri politike.

Kujtojmë që, pyetja “kush është lideri i opozitës?” mbetet ende pa përgjigje të qartë. Derisa opozita ta gjejë këtë përgjigje brenda vetes, Ali Ahmeti do të vazhdojë të mbetet pika e referencës, ndërsa Arben Taravari sfiduesi që po përpiqet ta zhvendosë epiqendrën. Nëse kjo përpjekje do të shndërrohet në lidership real apo do të mbetet simbolikë e një fitoreje lokale kjo mbetet të shihet në të ardhmen.

/Zhurnal.mk