Ademi nga BDI: Sa më shpejt zgjedhje të parakohshme parlamentare!
Sekretari i Përgjithshëm i BDI-së, Arber Ademi, deklaroi mbrëmë për Click Plus në TV21 se koalicioni AKI, i udhëhequr nga partia e tyre, mbetet i vendosur se janë të nevojshme zgjedhje të parakohshme parlamentare, përcjell INA.
Sipas Ademisë, legjitimiteti në nivel shtetëror i takon koalicionit opozitar të përbërë nga disa parti të bllokut politik shqiptar.
“Qëndrojmë pas kërkesës sonë për zgjedhje të parakohshme parlamentare, sepse në nivel shtetëror legjitimiteti i takon koalicionit AKI. Sot përballemi me përpjekje dhe, siç do të thoja, atentate ndaj Marrëveshjes së Ohrit, dhe kjo situatë është rezultat i faktit që shteti udhëhiqet nga një qeveri pa legjitimitet”, tha Ademi në emisionin “Clik Plus”.
Ai shtoi se rezultati që koalicioni arriti në zgjedhjet e përsëritura në katër komunat ishte i pritshëm.
“Dallimi krahasuar me raundin e parë më 19 tetor është shumë i madh. Që nga ajo ditë deri sot jemi mashtruar. Ka pasur parregullsi zgjedhore në shumë dimensione, veçanërisht në sabotim dhe mosarritjen e kuorumit të nevojshëm me qëllim”, theksoi sekretari i përgjithshëm i BDI-së.
/(INA)
