Rusia godet Ukrainën me raketën balistike Oreshnik, një nga armët e saj më të fuqishme!

Rusia sulmoi Ukrainën gjatë natës me raketën hipersonike Oreshnik, një nga armët më të avancuara të saj, që lëviz rreth 10 herë më shpejt se shpejtësia e zërit. Ministria ruse e Mbrojtjes tha se sulmi ishte pjesë e një goditjeje masive me armë precize tokësore dhe detare.

Raketa, e aftë të mbajë koka luftarake konvencionale ose bërthamore, u raportua se goditi infrastrukturë kritike, ndërsa autoritetet ukrainase konfirmuan shpërthime në Kiev dhe Lviv. Në Kiev u vranë katër persona dhe dhjetë u plagosën; në Lviv nuk u raportuan viktima.

Moska e justifikoi sulmin si përgjigje ndaj një tentative të supozuar të Ukrainës për të goditur rezidencën e presidentit Vladimir Putin, pretendim që është mohuar nga vlerësimet amerikane. Sulmi ndodhi mes paralajmërimeve për përshkallëzim, goditjeve të vazhdueshme ndaj infrastrukturës energjetike dhe tensioneve të shtuara mes Rusisë, SHBA-së dhe aleatëve perëndimorë.

/ts