Diaspora, bastioni më i fuqishëm i fitores së Albin Kurtit
Roli i diasporës në zgjedhjet e Kosovës është bërë gjithnjë e më i rëndësishëm, veçanërisht në suksesin elektoral të Lëvizjes Vetëvendosje (LVV). Në zgjedhjet e 28 dhjetorit, LVV-ja mori 13,899 vota nga diaspora, ose 86.74% të votave jashtë vendit, duke e konfirmuar mërgatën si një bazë të fortë mbështetëse.
Anëtari i Listës Guxo, Luan Gacaferi, vlerëson se diaspora voton nga bindja dhe pa interesa personale, duke mbetur bastioni më i qëndrueshëm i LVV-së dhe Albin Kurtit, për sa kohë që qeverisja fokusohet te shteti dhe jo te interesat personale.
Ndërkohë, analisti Gani Qarri thekson se, ndonëse diaspora ka rol të rëndësishëm, bastioni kryesor i LVV-së janë qytetarët brenda Kosovës. Sipas tij, fitorja rekord e Kurtit dhe mbi 50% e votave për LVV-në erdhën kryesisht si rezultat i mbështetjes së votuesve rezidentë dhe ndëshkimit të opozitës për bllokadën institucionale, retorikën e ashpër dhe pengimin e proceseve shtetërore.
Qarri nënvizon se votat e diasporës, ndonëse domethënëse politikisht, nuk ishin faktori vendimtar për fitoren, duke e cilësuar rezultatin si reflektim të vullnetit të shumicës së qytetarëve të Kosovës dhe funksionimit demokratik të zgjedhjeve.
/ms
