Nëse rryma ju vjen shumë shtrenjtë, ja çfarë duhet të bëni?

Shumë familje në Maqedoninë e Veriut morën këtë dimër fatura të janarit më të larta për energjinë elektrike. Brenda dy muajve janë paraqitur rreth 15.000 ankesa në “EVN Home”, por vetëm 15% u vërtetuan si të sakta dhe u korrigjuan; në shumicën e rasteve shumat e larta lidhen me konsum real ose llogaritje vlerësuese.

Qytetarëve u rekomandohet të kontrollojnë vetë faturat duke krahasuar kilovat-orët e faturuar me gjendjen aktuale në matës. Nëse ka mospërputhje të mëdha, duhet të bëjnë fotografi dhe të paraqesin ankesë. Shpesh dallimet krijohen nga leximet e parregullta të matësit, faturat paushale ose gabime teknike.

EVN Home faturon energjinë, ndërsa Elektrodistrubucioni është përgjegjës për matësit, por konsumatorët duhet t’i drejtohen vetëm EVN Home. Ankesa paraqitet brenda 8 ditëve nga faturimi përmes emailit, portalit online, qendrave të shërbimit ose telefonit. Gjatë shqyrtimit të ankesës, energjia nuk mund të ndërpritet për pjesën e kontestuar nëse paguhet pjesa e pakontestuar.

/ina