Kur jepet MIRËNJOHJE?! Shkruan deputetja Valbona Adili Emina

Sot, mirënjohja shpesh jepet si dekor ceremonial, për të plotësuar rendin e ditës ose për të bërë një fotografi më shumë. Jo domosdoshmërisht për një kontribut real, por sepse “duhet dhënë”.

Mirënjohja, në thelb, nuk është dhuratë protokollare dhe as shpërblim për simpati. Ajo supozohet të jepet kur ekziston një punë e bërë, një sakrificë konkrete ose një rezultat i matshëm dhe jo thjesht për prezencë apo për miqësi.
Kur mirënjohjet ndahen pa kritere, pa shpjegim dhe pa transparencë, ato humbin vlerën e tyre.

Atëherë nuk nderohet kontributi, por formaliteti; nuk vlerësohet puna, por radhitja në listë.
Ata që i japin mirënjohjet, me siguri e dinë pse po i japin… ose të paktën kështu supozohet. Edhe ata që i marrin, ndoshta e dinë pse po i marrin ose ndoshta jo. Sepse kur arsyeja mungon, mirënjohja mbetet vetëm një copë letër e bukur, pa peshë dhe pa kuptim.

Në fund, mirënjohja ka vlerë vetëm kur është e drejtë, e merituar dhe e sinqertë. Të gjitha të tjerat janë thjesht dekor.

/ms