Baba Vangës, si shpërndahen ‘profecitë’ e rreme në mediat shqiptare ?

Më 3 dhjetor, ATSH publikoi sërish një artikull mbi “profecitë” e Baba Vangës, ndonëse nuk ekziston asnjë provë që ajo të ketë lënë ndonjë parashikim të shkruar. Në media shqiptare qarkullojnë prej vitesh dhjetëra artikuj sensacionalistë të përkthyer nga tabloide të huaja, të mbushura me teori konspirative, paralajmërime katastrofash dhe narrativa pro-Putin.

Studiuesit i konsiderojnë këto publikime si pjesë të fushatave dezinformuese që shfrytëzojnë misticizmin dhe apokaliptizmin për të shpërndarë propagandë. Sipas tyre, shumë nga profecitë e atribuuara Vangës janë trillime të mëvonshme dhe përdoren për të forcuar narrativa pro-ruse apo kundër BE/NATO.

Në realitet, Baba Vanga ishte e njohur në Bullgari kryesisht për këshilla shëndetësore dhe jo për parashikime gjeopolitike. Megjithatë, media të afërta me Kremlinin kanë ndërtuar rreth saj mite të reja që i shërbejnë imazhit të Putinit.

Në Shqipëri, këto “profeci” riprodhohen pa verifikim nga shumë media, përfshi televizione kombëtare, duke u bërë virale çdo fundviti. Ky proces – ku lajmet kalojnë nga rrjete sociale në tabloide dhe më pas në media shqiptare – funksionon si një “lavanderi lajmesh të rreme”. Ekspertët paralajmërojnë se kjo ndotje informacioni e vështirëson dallimin mes fakteve dhe spekulimeve dhe rrezikon të manipulojë publikun.

/ina