Brenda avionit 400 milionë dollarësh të Trump..!?

Një Boeing 747 privat, me vlerë mbi 400 milionë dollarë, është në qendër të vëmendjes pas lajmeve se presidenti Donald Trump ka rënë dakord ta pranojë si dhuratë nga Katari. Ky avion gjigand, më parë në shërbim të familjes mbretërore të Katarit, përshkruhet si një “pallat fluturues” dhe pritet të përdoret si Air Force One i përkohshëm.

Avioni është një rezidencë e plotë ajrore që përfshin: një dhomë gjumi kryesore luksoze, një dhomë gjumi për mysafirë, dy banja të mëdha me dush, nëntë tualete të vogla, pesë kuzhina të pajisura, si dhe një zyrë private.

Arredimi i brendshëm përfshin panele druri, mobilim luksoz, dhjetëra ekrane televizori dhe pajisje të nivelit të lartë, duke e kthyer avionin në një mjedis presidencial në ajër. Avioni mund të transportojë rreth 90 pasagjerë dhe 14 anëtarë të ekuipazhit, dhe më parë ka qenë pjesë e flotës VIP të Qatar Airways, në dispozicion të elitës politike të vendit.

Trump e bëri të ditur vendimin për ta pranuar këtë dhuratë në platformën e tij Truth Social, duke e quajtur avionin një zgjidhje “të përkohshme” për të zëvendësuar Air Force One aktual, ndërsa pritet përfundimi i modeleve të reja nga kompania Boeing, e cila është përballur me vonesa dhe mbi buxhetim.

Megjithëse avioni është mbi një dekadë i vjetër, dhurata ka ngjallur polemika, për shkak të vlerës së saj, natyrës diplomatike të marrëdhënieve mes Trumpit dhe Katarit, dhe çështjeve të mundshme ligjore e etike që lidhen me pranimin e dhuratave nga qeveri të huaja citon DailyMail.

Ky veprim pritet të shkaktojë debat të fortë politik dhe të tërheqë vëmendjen e institucioneve të mbikëqyrjes etike në SHBA, ndërsa vetë Trumpi e paraqet atë si një zgjidhje praktike dhe patriotike në kohë sfidash për industrinë ajrore amerikane.

/tv21