Pamje dramatike nga Austria, autostradat bëhen lumenj..!?

Pas reshjeve të rrëmbyeshme që goditën rajonin lindor të Steiermark-ut gjatë fundjavës, autoritetet u përballën me një situatë emergjente në autostradën Pyhrn (A9), ku disa rrëshqitje dheu bllokuan totalisht qarkullimin në të dy drejtimet pranë zonës Übelbach.

Sipas burimeve nga ASFINAG, kompania përgjegjëse për infrastrukturën rrugore në Austri, pesë rrëshqitje të mëdha dheu mbuluan rrugën me baltë dhe gurë deri në dy metra lartësi.

Pamjet nga vendngjarja tregojnë punonjës të ASFINAG dhe ekipet e shpëtimit duke ecur në ujëra që u arrinin deri në bel, ndërsa përpiqeshin të vlerësonin dëmet dhe të fillonin pastrimin, raporton Mërgata.

“Ka qenë një natë dramatike,” u shpreh një përfaqësues i ASFINAG. “Vëllimi i reshjeve ishte i jashtëzakonshëm, duke shkaktuar jo vetëm përmbytje, por edhe rrëshqitje masive të dheut në terrene të pjerrëta.”

Autostrada A9 u mbyll menjëherë në të dy drejtimet për arsye sigurie, dhe mbeti e tillë për disa ditë për shkak të dëmtimeve të rënda dhe sasisë së madhe të materialeve që duheshin hequr. Qarkullimi u devijua në rrugë alternative, ndërsa autoritetet këshilluan drejtuesit e mjeteve të shmangnin zonën.

Ndërkohë, banorët në zonat përreth u përballën me përmbytje në shtëpitë dhe pronat e tyre, dhe disa rrugë lokale u bënë të pakalueshme. Nuk raportohet për të lënduar deri në këtë moment, por dëmet materiale priten të jenë të konsiderueshme.

Meteorologët paralajmëruan se reshjet mund të vazhdojnë edhe gjatë ditëve në vijim, duke rritur rrezikun për rrëshqitje të tjera dhe përmbytje në zonat më të ndjeshme.

/ms