Ramazani dhe 7 Marsi bashkojnë personalitete shqiptare në Zvicër

Rajoni dhe Bota

Në një atmosferë të ngrohtë dhe simbolike, mbi 100 personalitete nga fusha të ndryshme – teologë 60 nga Zvicra, filantropë, afaristë, intelektualë, bëmirës dhe veprimtarë nga Zvicra e më larg – u mblodhën në një sofër të përbashkët me flamurin kombëtar për të shënuar një ngjarje të dyfishtë: muajin e bekuar të Ramazanit dhe Ditën e Mësuesit.

Kjo ngjarje e veçantë, organizuar nga Komuniteti Musliman Shqiptar në Zvicër (KMSHZ) dhe Rrjeti i Miqësisë Shqiptare, bashkoi përfaqësues nga politika, diplomacia, biznesi, humaniteti dhe bota akademike, duke forcuar lidhjet mes shqiptarëve në mërgatë dhe duke reflektuar mbi rëndësinë e ruajtjes së identitetit kombëtar.

Të pranishëm në këtë iftar ishin ambasadori i Maqedonisë së Veriut, z. Rexhep Demiri, ambasadori i Kosovës, z. Mentor Latifi, si dhe përfaqësues të ambasadës së Shqipërisë, z.Valon Gashi, sekretar dhe Shefi i Misionit Konsullor të Republikës së Kosovës në Cyrih, z.Vigan Berisha. Personalitete të njohura nga SHBA-ja si z.Sahit Muja, filantrop, pastaj kryetari i Rrjetit të Bizneseve Shqiptare në Zvicrën Qëndrore, z.Visar Robelli, Prof.dr.Fadil Çitaku, PhD.Dashnim Hebibi, z.Fehim Abazi, imam nga Qendra Shqiptare për Integrim, Kulturë dhe Religjion në Lozanë, Prof.dr. Bashkim Aliu, nga Kosova, Maqedonia e Veriut, Lugina e Preshevës dhe vende të tjera, ku shtuan peshën dhe rëndësinë e këtij takimi.

Një tryezë diskutimi për të ardhmen e gjuhës shqipe

Në kuadër të kësaj mbrëmjeje, pas një programi të pasur por të shkurtër me ilahi dhe një poezi për 7 marsin u mbajt edhe një tryezë diskutimi e udhëhequr nga z. Florim Useini, kryetar nderi i Rrjetit të Bizneseve Shqiptare në Zvicrën Qëndrore.

Tema kryesore ishte “Mërgata dhe mësimi i gjuhës shqipe”, ku disa nga të ftuarit ndanë ide dhe propozime për forcimin e arsimit shqip në diasporë në kuadër të LAPSH-it.

Kryetari i KMSHZ-së, z. Mehas Alija, theksoi rëndësinë e bashkëpunimit me LAPSH-in në Zvicër, duke shprehur gatishmërinë për të kontribuar në projekte që ndihmojnë ruajtjen e gjuhës dhe kulturës shqiptare. Nga ana tjetër, kryetari i Rrjetit të Miqësisë, z. Meti Krasniqi, mbajti një fjalim me shumë përmbajtje mbi domosdoshmërinë e bashkimit për të ardhmen e brezave të rinj shqiptarë dhe bashkëpunimit nëpër fusha të ndryshme në të mirë të komunitetit tonë.

Një mbrëmje me frymën e rilindjes kombëtare

Xhamia Shqiptare në Winterthur, e cila priti këtë tubim ku nuk mungoi sofra edhe flamuri ynë kombëtar edhe ate i qëndisur rreth e rreth me ngjyrë floriri, u shndërrua në një vatër frymëzimi, duke kujtuar rolin e dikurshëm të teologëve shqiptarë në përhapjen e arsimit dhe kulturës kombëtare. Kjo natë, përtej iftarit me shumëllojshmëri ushqimesh që u shtruan dhe me mikëpritje vëllazërore dhe kremtimit të 7 Marsit, ishte një dëshmi e fuqishme se bashkimi dhe solidariteti janë çelësi për të ardhmen e komunitetit shqiptar në mërgatë.

Me premtimin për projekte të reja dhe bashkëpunime të mëtejshme, kjo mbrëmje mbetet një shembull i shkëlqyer i harmonisë dhe përkushtimit ndaj kombit dhe vlerave të tij. Xhamia Shqiptare në Winterthur plotësonte të gjitha kushtet për një organizim të tillë dhe do të mbetet një xhami me vlera të veçanta. Të gjithë të pranishmit mbetën shumë të kënaqur me pamjen e xhamisë, kushtet dhe stafin e saj.