Rrjetet sociale arenë e dezinformatave dhe gjuhës së urrejtjes..!?

Gjuha e urrejtjes, paragjykimet, shpifjet dhe qëndrimet negative për kundërshtarët politikë janë ndër veset më të ulëta që nuk prodhojnë as pikë minimale politike në të kundërtën vetëm pasqyrojnë të vërtetën reale të atyre individëve apo grupeve se në çfarë niveli janë.

Anketa e fundit e opinionit publik nga Instituti për Hulumtime Politike në Shkup, për Detektor, zbulon se 90% e qytetarëve maqedonasë kanë vënë re përhapjen e gjuhës së urrejtjes në shoqërinë e tyre, kryesisht përmes rrjeteve sociale dhe me motivacion politik.

Një nga tre qytetarë beson se kjo gjuhë është inkurajuar nga bindjet politike, ndërsa një pjesë e vogël e kësaj gjuhe është e lidhur edhe me përkatësinë etnike, pamjen fizike, besimet fetare dhe moshën, shkruan Zhurnal.

Rrjetet sociale vendet ku më së shumti shprëndahen gjuha e urrejtjes dhe deziniformatat –
Nëpër rrjetet sociale ka një shpërthim dezinformatash, gjuhë të urrejtjes dhe propagandë që paraqesin rrezik për demokracinë në përgjithësi. Kështu u tha gjatë panel diskutimit të organizuar nga Instituti për Media dhe Analitikë, ku panelistët folën për ballafaqimin me dezinformatat nëpër rrjetet sociale. Në pajtueshmëri me rregullativën e re të Bashkimit Evropian, Agjencia për Shërbime Audio dhe Audiovizuele merr kompetenca në pjesën e mediave online dhe rrjeteve sociale.

“Nga korriku i vitit 2023, me ndryshimet e ligjit për shërbime audio dhe audio vizuele, u bë harmonizim I këtij ligji me direktivën për shërbime audio vizuele të BE-së, në pjesën ku Agjencia si trup rregullator, u bë kompetente për platformat për shpërndarjen e videove, për shembuj siç janë facebook, youtube, tiktok dhe kështu me radhë,” tha Emilija Ptreska Kamenjarova, Agjencia për Shërbime audio dhe audio vizuele.

Në fakt, gjuha e urrejtjes dhe dezinformatat si fenomene më së shpeshti atakohen dhe janë prezentë në mesin tonë gjatë kohës së fushatave parazgjedhore. Atëherë kur makineri të shumta digjitale të financuara nga parti politike motivojnë dhe mbështesin njerëz për të bëri anti-fushatë kundër oponentëve.

Sa është i rëndësishëm edhe edukimi mediatik në kohë të fushatave zgjedhore –
Edukimi mediatik në çdo kohë është i rëndësishëm, sepse si zakonisht gjatë gjithë kohës jemi të ekspozuar nga informacione pafund, pa numër, e nga gjitha anët e botës, por gjatë kohës së fushatave zgjedhore edukimi mediatik duhet të jetë i domosdoshëm për secilin vend, edhe për Maqedoninë e Veriut, sepse mediat janë pasqyra dhe dritarja përmes të cilës kandidatët dhe partitë politike tentojnë të futen në shtëpitë e qytetarëve, edhe gjatë natës edhe gjatë ditës deri ditën e zgjedhjeve.

Por, çfarë janë fushatat zgjedhore, dhe pse pikërisht gjatë kësaj periudhe është i rëndësishëm edukimi mediatik? “Fushata zgjedhore është paraqitje publike e kandidatëve të konfirmuar nga organet kompetente dhe programet e tyre në periudhën parazgjedhore për zgjedhje të caktuara”, thuhet në fjalorin në nenin 2 të Kodit Zgjedhor.

Sipas ligjit, fushata fillon 20 ditë para rrethit të parë të zgjedhjeve, gjatë kësaj periudhe fluksi i qarkullimit të informacioneve në mediat tradicionale e ato digjitale është shumë i lartë, gjë që rrit me automatizëm edhe ekspozimin e qytetarëve ndaj lajmeve dhe informatave me natyra e qëllime të ndryshme.

Edukimi mediatik gjatë kohës së fushatave mbron qytetarët nga “dezinformatat” dhe “lajmet me porosi”, sikurse ombrella nga shiu i rrëmbyeshëm i vjeshtës. Dezinformatat dhe lajmet me porosi qarkullojnë pa ndalë, sepse interesi i partive të ndryshme është i lartë për të depërtuar deri te grupet e synuara, ndërkaq, qytetarët e edukuar mirëfilli janë të gatshëm e në gjendje të klasifikojnë dhe përzgjedhin lajmet dhe informacionet nga cilat burime do t’i marrin.

Në realitet fushatat zgjedhore vetëm zyrtarisht fillojnë 20 ditë para zgjedhjeve, sepse në realitet dhe praktikë fillojnë shumë më herët se kaq, dhe mediat gjatë gjitha zhvillimeve që ndodhin në terren raportojnë, organizojnë debate të ndryshme, gjë që ndihmon edhe më shumë fushatën e pa filluar. Dhe, kjo periudhë e cila lirshëm mund të quhet si “parafushatë” është pikërisht edhe më delikate se fushata, sepse gjithçka veprohet jo zyrtarisht por qëllimi mbetet po i njëjti sikurse gjatë fushatës, promovim dhe bindje.

Kujtojmë që, fushata elektorale për rundin e parë të zgjedhjeve presidenciale të 24 prillit fillon më 4 prill dhe zgjat 20 ditë. Rundi i dytë i zgjedhjeve presidenciale do të mbahet më 8 maj së bashku me zgjedhjet parlamentare.

/Zhurnal.mk