Emigranti nga Afganistani që vrau dy persona me thikë në Gjermani, nuk i ishte pranuar azili..!
Emigranti afgan që goditi me thikë një djalë 2-vjeçar dhe një kalimtar në një park të Gjermanisë, supozohej se kishte lëshuar vendin.
Sulmuesi me thikë, i moshës 28-vjeçare i kishte zënë pritë një grupi të një çerdhe në Gjermani, ku kishte vrarë një fëmijë maroken dhe një 41-vjeçar gjerman i cili ishte munduar të mbronte fëmijët në “Schoental Park”, transmeton Portali Mërgata.
Sipas të përditshmes gjermane, Spiegel, autori i vrasjeve është një azilkërkues mashkull i quajtur Enamullah O., i cili thuhet se jetonte në Gjermani ku ishte akomoduar si azilant. Në rajonin ku jetonte, thuhet se ai njihej si person me probleme mendore.
Enamullah O., kishte ardhur në Gjermani në nëntor të vitit 2022, por të njëjtit nuk i ishte dhënë azil nga institucionet gjermane. Ai kishte deklaruar se më 4 dhjetor të vitit 2024 do të largohej vullnetarisht nga vendi, raporton “Bild”.
“Si rezultat, më 11 dhjetor, Ministria për Emigracionin dhe Azilin kishte mbyllur procedurën e azilit dhe i kishte kërkuar personit në fjalë që të largohej nga vendi”, ka deklaruar Ministri i Brendshëm i Bavarisë, Joachim Herrman, në një konferencë për media.
Kancelari gjerman, Olaf Scholz, në anën tjetër ka deklaruar se ka kërkuar hetim dhe përgjigje nga autoritetet pse i dyshuari afgan për vrasjen e dy personave ka arritur të qëndronte më gjatë në Gjermani, sesa afati që i është dhënë për largim.
“Autoritetet duhet të shpjegojnë sa më shpejtë që të jetë e mundur pse sulmuesi ishte ende në Gjermani”, ka deklaruar Scholz në një reagim ndaj sulmit.
Sulmuesi me thikë ishte arrestuar në vendin e ngjarjes ku edhe i është sekuestruar thika e kuzhinës që dyshohet se e kishte përdorur për sulm.
/PortaliMërgata/
