Kush është gjykatësi Enver Bexheti që e mbajti në sirtar rastin e Mijallkovit? (FOTO)
Filloi si sekretar në komunën e Bogovinës, dhe arriti në pozitën e gjykatësit në Gjykatën e Apelit, i cili vendoste për fatin e rasteve të krimit të lartë dhe me interes të madh publik, shkruan Fokus.
Ai bashkë me ish-zëvendëskryeministrin Artan Grubi u shpallën non grata nga SHBA, duke u futur në listën e re të zezë të Departamentit Amerikan të Shtetit me personat dhe familjet e tyre të afërta, të cilëve u ndalohet hyrja në Shtetet e Bashkuara të Amerikës.
Në një njoftim për media, DASH tha se Grubi dhe Bexheti “janë përfshirë në korrupsion të madh duke pranuar ryshfet për t’i minuar proceset gjyqësore të lidhura me dënimin penal të Sasho Mijalkovit, ish-drejtorit të shërbimit sekret”.
Publiku nuk e di se si duket Enver Bexheti, kush ishte gjykatësi raportues në Apel për rastin “Target-Fortesa” dhe që me muaj e mbante në sirtar rastin për përgjimin masiv në të cilin ish-drejtori i DSK-së, Sasho Mijalkov, fillimisht u dënua me 12 vjet burg.
Kryetarja e Këshillit Gjyqësor, Vesna Dameva, nën presionin e opinionit publik e kishte vënë në rend dite rastin e lëndës së robëruar “Target-Fortesa”, por jo vetëm atë, por edhe lëndën “Transporteri” ku akuzohej ish-kryetari i Manastirit Vlladimir Taleski, të cilën nga ana tjetër, Bexheti e mbajti në sirtar për tre vjet dhe nuk e vuri në vendimmarrje.
Sipas biografisë së publikuar në faqen e Gjykatës së Apelit thuhet se ka diplomuar në Fakultetin Juridik në Prishtinë në vitin 1990 dhe ka dhënë provimin e jurisprudencës në vitin 2004.
Filloi të punojë si sekretar në komunën e Bogovinës, ishte menaxher i një kompanie private, e më pas ishte sekretar i përgjithshëm i Universitetit të Tetovës, në periudhën 2002-2004.
Ai nga viti 2005 deri në vitin 2010 ka punuar si avokat.
Për herë të parë në vitin 2010 është zgjedhur në Gjykatën Themelore Shkup 1, gjegjësisht në kohën kur ishte në pushtet koalicioni VMRO-DPMNE – BDI dhe përparoi shumë shpejt në Apel, gjegjësisht për dy vjet, dhe më datë 4.12.2012, është zgjedhur gjykatës në Apel ku ka vepruar fillimisht në çështjet civile.
“Ka ndjekur mbi 30 seminare dhe punëtori si jurist, dhe që nga viti 2010 ka ndjekur mbi 60 seminare dhe trajnime të organizuara nga Akademia për Gjyqtarë dhe Prokurorë Publikë”, shkruhet në biografinë e tij.
“Futja e Artan Grubit dhe Enver Bexhetit në listën e zezë është dëshmi se ndërhyrja politike në gjyqësor nuk mundet dhe nuk do të tolerohet. Shtetet e Bashkuara do të vazhdojnë të identifikojnë ata që janë të përfshirë në korrupsion të konsiderueshëm që minon institucionet demokratike dhe dëmton besimin e publikut. Grubi dhe Bexheti janë përfshirë në korrupsion të madh duke minuar proceset gjyqësore të lidhura me dënimin penal të Sasho Mijallkovit, ish-drejtorit të shërbimit sekret. Askush nuk është mbi ligjin, dhe llogaridhënia është thelbësore për përparim,” theksoi ambasadorja amerikane në Shkup, Angela Ageller.
FOTO:
/(INA)
