Nga dyqanet apo shtëpiak ! Kush është ajvari më i mirë..?

Në dallim prej viteve të mëparshme, tradita e përgatitjes së ajvarit në kushte shtëpiake po fillon të venitet ngadalë. Jo vetëm ikja e popullatës jashtë shtetit dhe zvogëlimi i familjeve, por kryesisht edhe shtrenjtimi i madh i perimeve, druve dhe materialeve tjera po bën që shtëpiaket të mendohen mirë për leverdinë e përgatitjes së turshive të ndryshme. Po ndryshojnë edhe traditat.

Pjesërisht për shkak të ndalimeve ligjore për përgatitjen e ajvarit jashtë, pjesërisht për shkak të mënyrës moderne dhe dinamike të jetesës. Përgatitja e ajvarit në shtëpi nuk është tanimë rregull, por një përjashtim.

Megjithatë, kjo nuk do të thotë se niveli i konsumit të ajvarit është ulur. Raftet nëpër markete, sidomos në këtë periudhë të vitit, janë plot me ajvar të llojeve dhe prodhuesve të ndryshëm. Kjo hap shumë dilema për konsumatorët, qëllimi kryesor i të cilëve është të marrin një produkt të shijshëm dhe cilësor me një çmim të përballueshëm.

Në dyqanet e ndryshme, çmimi i ajvarit luhatet në varësi prej gramazhës, prodhuesit dhe ofertës në dyqane e ndryshme nga 150 deri mbi 300 denarë për një kavanoz. Vetë fakti se një kilogram speca vështirë se gjenden nën 60 denarë, por edhe më shumë, ndërsa patlixhani varion edhe deri 30 denarë, apo një litër vaj së paku 70 dhe më shumë denarë.

“Me fjalë tjera, për një kavanoz ajvar nevojiten së paku tre deri katër kilogram speca në varësi prej cilësisë, apo së paku 180 denarë – e ku mbeti këtu druri, vaji, kavanozat, por edhe mundi dhe koha e harxhuar”, ankohen amviset.

Në supermarkete mund të blihet edhe ajvar i prodhuar industrial në fabrikat vendore prej 350 gram dhe prej 700 deri 800 gram, çmimet e të cilit varion prej 2.5 deri 5 euro në supermarkete të ndryshme, por edhe nga aksionet që zgjasin një javë apo më gjatë, si dhe nga blerjet direkt në dyqanet e fabrikave-prodhuese të ajvarit. Në rrjetet sociale , ajvari i shtëpisë shitet me 400 dhe më shtrenjtë për një kavanoz. Duke qenë se çmimi është gjithmonë i shtrenjtë për dikë, në rrjetet sociale është shfaqur një përllogaritje se sa kushton përgatitja e ajvarit të bërë vetë.

“Për ata që mendojnë se ajvari është i shtrenjtë nëse është 400 apo 500 denarë, ja si duken shpenzimet e një kavanozi ajvar. Le të marrim, për shembull, 50 kilogramë speca – çmimi varion nga 45 deri në 60 denarë për kilogram, varësisht se në cilin rajon të vendit jeni. 10-15 kilogramë patëllxhan sillet nga 10-20 denarë për kilogram, edhe varësisht se në cilin rajon të vendit jeni. Çmimet që i përmend janë me shumicë, nëse të njëjtat i blini në dyqan ushqimor apo në treg çmimet do të ishin – speci 60-90 denarë për kilogram, patëllxhani 20-30 denarë për kilogram.

Që do të thotë që nga fillimi investoni nga 2500 deri në 5000 denarë, varet nga çmimet – vetëm për specat dhe patëllxhanin. Shtoni edhe 500 denarë për vajin dhe kripën. Për atë sasi do të bëni rreth 15-20 kavanoza ajvar. Për të bërë ajvarin, ju duhen të paktën dy ditë, nëse e bëni vetë. Ai automatikisht kushton tre mijë denarë.

Që do të thotë investoni 6000-8000 denarë për të marrë 15-20 kavanoza ajvar. Nëse e shet ajvarin për 500 denarë kavanozi, maksimumi 2000 deri në 4000 denarë ke marrë për punën dyditore”. Ky është një përshkrim i detajuar për ata që thonë se ajvari është shumë i shtrenjtë po të ishte 500 denarë kavanozi, shkruajnë në rrjetet sociale.

/(koha.mk)