Ziadin Sela kryetar i ardhshëm i BDI-së..!?

Zhvillimet politike në Maqedoninë e Veriut po bëhen sa dramatike aq tragjike sepse po dëshmohet që edhe kur hetohen e zbulohen krimet financiare nuk mbanë askush llogari e përgjegjësi. Megjithatë, mësë rëndi këto zhvillime po i përjeton BDI e cila nga një parti serioze ka kaluar në një parti që është në prag të shpartallimit të plotë.

Kreu i kësaj partie, Ali Ahmeti, është në prag të pensionimit, shtylla tjetër e kësaj partie Artan Grubi është në arrati. Pra, BDI po ngelet pa çati. E çuditërisht Sela si oponenti e kundërshtari i Ahmetit lehtësisht u afrua në këtë parti e mesa ngjan po i shkon mbarë e mirë. A mund të ndodhë që Sela të jetë pasues i Ahmetit? shkruan Zhurnal.

Ahmeti Sela një dyshe interesante që po i qëndrojnë besnik njëri tjetrit –
Ali Ahmeti dhe Ziadin Sela ishin dikur oponent politik, kundërshtar të hatashëm kishin deklarata fyese e akuzuese për njëri tjetrin. Nga akuzat e Selës se Ahmeti kishte përgatit plan për eliminimin e tij fizik deri te ofendimet e Ahmetit se nuk ulet në tavolinë me horra. Por, këto janë kujtime të hidhura të së kaluarës. Sepse, sot kemi një situatë krejtësisht ndryshe, Ahmeti e Sela besnik në bashkëpunimin artificial të quajtur Front Evropian.

BDI si kurrë më parë ka nevojë për një prijës me energji të plotë, pasi kryetari i kësaj partie është lodhur, e më shumë se lodhje është i dëshpëruar maksimalisht që po shkon në histori si humbës. Nuk mjafton edhe me kaq, bashkëpunëtori i tij më i afërt tani më është edhe në listë të zezë edhe në arrati.

Armiqësia Sela-Ahmeti më shumë kishte qenë për show mediatik e për manipulim të opinionit publik. Sepse, derisa Sela thirrej për opozitar opozita ishte gjithmonë e përçarë. Kjo lë për të kuptuar që Ziadin Sela ka qenë besnik dhe në koordinim të vazhdueshëm me liderin nga Zajazi i Kërçovës, Ali Ahmeti. E mesa duket ky shërbim për kohë të gjatë që i ka bërë Sela Ahmetit nuk do të pastrohet vetëm me faktin që Ali Ahmeti e bëri deputet këtë të fundit.

Nuk përjashtohet mundësia që Ali Ahmeti mund t’ia ketë premtuar Ziadin Selës timonin e partisë. E ky premtim është më afër se asnjëherë drejt realizimit apo kalimit në praktik. Sot BDI është në krizë të thellë organizative, përpos që kaloi në opozitë kjo e fundit u godit në kokë nga SHBA-të, derisa figurën kyçe të kësaj partie, Artan Grubi, e futën në listë të zezë për korrupsion dhe ndikim në gjyqësi për lirimin e Sasho Mijallkov.

A do të pranohej Ziadin Sela në BDI nga anëtarët e kryesia aktuale?
Beteja më e madhe në partitë politike është kush do ta merr timonin e partisë. Por, kjo dilemë nuk ka ekzistuar në BDI derisa Ahmeti ishte në formë për ta ushtruar këtë pozitë. Por, tani siç argumentuam sipër që Ahmeti është në fund dhe nuk do mend që vazhdimit të funksionimit të kësaj partie i duhet një pasues që sado pak i afrohet lidershipit të Ahmetit.

Kandidat apo të interesuar për këtë pozitë mund të ketë me bollëk përbrenda partisë, por me shumë gjasë Ahmeti do të veprojë për të mos shkaktuar përçarje apo pakënaqësi përbrenda partisë do t’ia besojë partinë një prej jashtë. Ky mund të jetë Ziadin Sela.

Ali Ahmeti përgjatë qeverisjes me partinë e tij ka ndikuar për t’i edukuar nga militantët partiak deri te anëtarët e kryesisë qendrore që fjalën e fundit e jep lideri i partisë. E të gjithë janë treguar të dëgjueshëm pra e dëshmon që praktika që nuk e kanë pasur fare problem që nëse Ahmeti thotë e kërkon ndonjë gjë që nuk është në pajtim me ata, të njëjtin e kanë plotësuar pa hezituar vetëm se ka kërkuar lideri.

Pra, edhe përkundër pakënaqësive që mund të ketë përbrenda partisë gjitha zërat do t’i shuan vetë Ahmeti. Një gjë e tillë që të ndodhë sa është larg aq është afër. E kjo u dëshmua edhe dje kur para Kuvendit vet Ziadin Sela konstatoi që do të vazhdojë t’i qëndrojë besnik Ali Ahmetit. Derisa, Ahmeti mes Seles dhe Thaçit zgjodhi që bashkëpunimin ta vazhdojë me Ziadin Selën, ky është edhe argument shtesë që Sela Ahmeti janë shndërruar në bashkëpunëtorë shembullorë.

Kujtojmë që, kjo analizë është e bazuar në zhvillimet e fundit dramatike politike në vendin tonë. Mbetet të shihet ditëve e muajve në vijim nëse kjo analizë e Agjencisë së Lajmeve Zhurnal do të dalë e përafërt me ngjarjet që do të ndodhin në vijim.

/Zhurnal.mk