Zëvendësministri i Arsimit dhe Shkencës Lulzim Aliu me rastin e Ditës Ndërkombëtare të Gjuhës Amtare

Me rastin e Ditës Ndërkombëtare të Gjuhës Amtare pata nderin të marr pjesë në konferencën shkencore “Gjuha shqipe – identitet dhe jo politikë”, të organizuar nga Agjencia për Zbatimin e Gjuhës, bashkë me kryetarin e Kuvendit, Afrim Gashi, zëvendëskryeministrin, Izet Mexhiti, kryetarin e Alternativës, Zeqirija Ibrahimi dhe kolegë të tjerë profesorë.
📎
Më poshtë ju përcjellë fjalën time përshëndetëse:
Sot jemi mbledhur për të shënuar Ditën Ndërkombëtare të Gjuhës Amtare, ditë të veçantë që përfaqëson thelbin e një populli dhe identitetin e tij.
Kjo ditë nuk është thjesht një përvjetor që ne po nderojmë, por është një ditë që ne mbrojmë, kultivojmë dhe përhapim gjuhën tonë, pasurinë e pazëvendësueshme kombëtare.

Gjuha është një urë që lidh historinë e të kaluarës me synimet e së ardhmes, një mjet që na ndihmon të kuptojmë botën dhe një pasqyrë që pasqyron identitetin e një kombi. Përmes saj ne kujtojmë dhe ruajmë jehonën e brezave që na paraprinë.
Në tingujt e gjuhës jeton historia jonë, dhe në çdo fjalë buron shpirti i një kombi. Nuk ka identitet pa gjuhë, ashtu siç nuk ka rrënjë pa tokë.

Gjuha nuk jeton thjesht vetëm në fjalorë apo në libra, ajo buron nga njerëzit që e flasin dhe jeton në zemrat që e mbrojnë.
Duhet të kujdesemi për të, ta flasim me krenari dhe ta përcjellim me përkushtim.

Angazhimi ynë, si institucione apo edhe si shoqëri nuk është thjesht një detyrë, por një përgjegjësi e vazhdueshme për të krijuar një ambient ku çdo fëmijë të ketë mundësinë të mësojë, të rritet dhe të zhvillohet në gjuhën e tij amtare.
Ministria e Arsimit dhe Shkencës mbetet e përkushtuar në zhvillimin e arsimt që jo vetëm të avancojmë arsimin në gjuhën amtare, por edhe të sigurojmë cilësin e edukimit për të gjithë.

Ne e dimë se diversiteti gjuhësor nuk është thjesht një fakt kulturor, por një pasuri kombëtare dhe një vlerë universale që duhet mbrojtur dhe forcuar.
Duke investuar në edukimin dhe arsimin në gjuhën amtare, ne nuk po bëjmë vetëm një shërbim ndaj brezave të sotëm, por po hedhim themelet për një shoqëri më të hapur, më të ndërgjegjshme dhe më të pajisur për të përballuar sfidat e së ardhmes.

Ajo që mund të themi me siguri është se çdo hap i hedhur në këtë drejtim është një hap drejt një shoqërie më të drejtë, më të barabartë dhe më të ndërgjegjshme për rëndësinë e gjuhës dhe identitetin e saj.
Republika e Maqedonisë së Veriut është një mozaik kulturash dhe gjuhësh, dhe ky mozaik nuk na ndan, por na begaton.

Ne besojmë në një shoqëri ku gjuha e tjetrit nuk është thjesht një tingull i huaj, por një melodi që pasuron harmoninë tonë të përbashkët.
Respekti për të nuk është një hir që dhurohet, por një detyrim i ndërgjegjes sonë, sepse vetëm aty ku gjuhët lulëzojnë, shoqëria rritet e bëhet më e fortë.

Kjo ditë nuk është vetëm një reflektim mbi të shkuarën, por një thirrje për angazhim, që të vijojmë të investojmë në arsimim cilësor, në botime shkollore dhe materiale didaktike që pasurojnë gjuhën tonë amtare dhe e bëjnë atë më të fortë për brezat e ardhshëm.
Të nderuar pjesëmarrës,

Roli juaj si mësimdhënës, studiues apo bashkëpunëtor të Agjencisë së gjuhës është i pazëvendësueshëm. Jeni drita që ndriçon mendjet e reja, ura që lidh brezat dhe forca që mban të gjallë identitetin tonë kombëtar.
Puna dhe përkushtimi juaj janë themeli mbi të cilin forcohet gjuha jonë.

Gjuha nuk është një e kaluar e ngrirë, por një flakë e gjallë që lidh brezat dhe ndriçon të ardhmen.
Ta ruajmë, ta kultivojmë dhe ta përcjellim, meqë gjuha është e vetmja pasuri që nuk humbet.
Ju faleminderit dhe punime të mbara sesionit shkencor të kësaj konference!

/ms