Ylber Rufati: Ndotja e lumit Treska – Si zëvendës i Avokatit të Popullit do kërkoj veprim institucional

Në kuadër të kompetencave të Zëvendës Avokatit të Popullit për mbrojtjen dhe promovimin e të drejtave të qytetarëve, kam zhvilluar një vizitë në terren lidhur me situatën e rëndë të ndotjes së lumit Treska.

Gjatë vizitës në terren, së bashku me shoqatën koncesionare për menaxhimin e peshkut në lumin Treska dhe kryetarin e shoqatës Hunter Fish Kërçovë, u konstatua një gjendje serioze dhe shqetësuese.

Sipas të dhënave të prezantuara në terren nga shoqata koncesionare, kanë ngordhur mbi 10 mijë tonë peshk, duke shkaktuar një dëm të konsiderueshëm ekologjik dhe ekonomik.
Duke pasur parasysh përmasat e rastit dhe detyrimin e institucioneve për të mbrojtur mjedisin dhe të drejtat e qytetarëve, në cilësinë e Zëvendës Avokatit të Popullit do të ngre parashtresë pranë institucioneve kompetente, me kërkesë për:
– përcaktimin e burimit dhe shkakut të ndotjes;
– kontrollin e funksionimit të Qendrës për Trajtimin e Ujërave të Zeza;
– kryerjen e analizave laboratorike dhe verifikimeve profesionale;
– përcaktimin e përgjegjësisë eventuale të institucioneve dhe personave përgjegjës;
– vlerësimin zyrtar të dëmit ekologjik dhe ekonomik;
– ndërmarrjen e masave urgjente për ndalimin e mëtejshëm të ndotjes dhe mbrojtjen e lumit;

– dhe, nëse gjatë procedurës konstatohen elemente të veprave penale, ndërmarrjen e veprimeve përkatëse nga organet e ndjekjes penale.
Roli i Avokatit të Popullit nuk është të zëvendësojë organet inspektuese apo organet e ndjekjes penale, por të kërkojë nga institucionet kompetente që të veprojnë në mënyrë ligjore, efektive dhe në kohë dhe të mbrojë të drejtat e qytetarëve.

Ndotja e Treskës është një çështje që kërkon përgjigje institucionale dhe përgjegjësi të bazuar në fakte dhe prova.
Treska është pasuri natyrore e qytetarëve. Mbrojtja e saj është përgjegjësi institucionale.

/ms