VLEN: Gjuha shqipe, heqja e 20 përqindëshit për dinjitet !

Sot, në Ditën Ndërkombëtare të Gjuhës Amtare, theksojmë rëndësinë e mbrojtjes, avancimit dhe respektimit të gjuhës shqipe si një shtyllë themelore e identitetit tonë kombëtar dhe e barazisë në Republikën e Maqedonisë së Veriut.

Gjuha shqipe është lodhur nga politika dhe shpesh është trajtuar si çështje debati, e jo si një e drejtë e patjetërsueshme. Kjo na kujton ëndrrën e Faik Konicës, ku gjuha shqipe i shfaqet si një grua e bukur, por e veshur me lecka, duke u ankuar për mundimet dhe vështirësitë që i janë imponuar. Në vendin tonë, gjuha shqipe ka arritur një nivel të avancuar të përdorimit zyrtar, por ende ka hapësirë për përmirësim dhe forcim të zbatimit të saj në të gjitha nivelet institucionale.

Një nga sfidat më të mëdha mbetet pastrimi i Kushtetutës nga formulimet e papërshtatshme, si termi “20 për qind”, i cili nuk pasqyron realitetin dhe rolin e shqiptarëve në shoqërinë tonë. Shqiptarët nuk janë statistikë, por një pjesë e pandashme e shtetit, dhe gjuha jonë amtare duhet të trajtohet me dinjitetin që meriton. Kushtetuta duhet të jetë burim zgjidhjesh, jo frustracionesh, dhe është detyra jonë që të sigurojmë një formulim të drejtë, gjithëpërfshirës dhe të paanshëm.

Në kuadër të kësaj dite, u mbajt një konferencë shkencore e organizuar nga Agjencia për Zbatimin e Gjuhës, ku morën pjesë personalitete të rëndësishme institucionale dhe akademike. Në këtë ngjarje, kryetari i Kuvendit, Afrim Gashi, dhe zëvendëskryeministri i parë, Izet Mexhiti, theksuan domosdoshmërinë e zbatimit të plotë të gjuhës shqipe në të gjitha institucionet dhe nevojën për përmirësimin e kuadrit ligjor që garanton përdorimin e saj.

Koalicioni VLEN mbetet i përkushtuar në forcimin e të drejtave gjuhësore të shqiptarëve dhe në garantimin e një trajtimi të barabartë të gjuhës shqipe në të gjitha institucionet. Kjo nuk është vetëm një çështje juridike, por një detyrim moral dhe historik ndaj brezave të kaluar dhe të ardhshëm.

Në këtë ditë simbolike, ftojmë të gjithë qytetarët të reflektojnë mbi rëndësinë e ruajtjes dhe kultivimit të gjuhës amtare, si një pasuri e përbashkët që duhet të mbrohet dhe zhvillohet me përkushtim dhe përgjegjësi.

/ms