Vizita e Prof. Dr. Tahir Zajazit në Sh.F.K. “Gj. K. Skënderbeu” – Sërbicë

Shkolla fillore “Gj. K. Skënderbeu” në fshatin Sërbicë pati nderin të mirëpresë profesorin e mirënjohur, Prof. Dr. Tahir Zajazi, një nga nxënësit e gjeneratave të para të kësaj shkolle tetëvjeçare.

Kolektivi i shkollës e priti me shumë respekt dhe i uroi mirëseardhje në këtë vatër të arsimit, të cilën profesori e quajti me emocion: “shtëpia ime”.
Para të pranishmëve – shumica prej tyre ish-studentë të tij – Prof. Zajazi mbajti një fjalë rasti plot emocion dhe thellësi profesionale.

Me një ndjeshmëri të veçantë, ai evokoi kujtime nga koha kur ishte vetë nxënës i kësaj shkolle, duke përmendur me dashuri dhe përulësi mësuesit e asaj kohe. Kujtimet e tij të freskëta sikur ndalën kohën për një çast, dhe ai emocion i sinqertë u përçua fuqishëm edhe te arsimtarët e pranishëm.

Gjatë vizitës, profesori vizitoi të gjitha klasat, ku u ndal me nxënësit dhe theksoi rolin madhor që ka pasur dhe vijon të ketë kjo shkollë në edukimin e brezave në rrethin e Kërçovës. Takimet me nxënësit ishin të ngrohta e të mbushura me ndjenja.

Si shenjë mirënjohjeje dhe përkushtimi ndaj dijes, nga thesari i pasur i botimeve të tij, profesori dhuroi disa libra me vlerë të madhe për bibliotekën e shkollës – një dhuratë që do të ruhet si thesar në historinë e saj.

Faleminderit profesor i nderuar!
Dyert e shkollës sonë do të jenë gjithmonë të hapura për Ju. Jemi të nderuar dhe të privilegjuar për vizitën tuaj kaq kuptimplote, emocionale dhe domethënëse.
Në emër të kolektivit të shkollës fillore “Gj. K. Skënderbeu” – fshati Sërbicë, ju urojmë shëndet të plotë dhe suksese të mëtejshme në jetë!

/tvgurra