Vdekja e urraaa-patriotizmit dhe shumimi i kuletë-patriotëve.. Nga Dr.prof Arbër Çeliku

Urraaa-patriotët, që për dy dekada vrisnin e prisnin në emër të partisë së kuletë patriotizmit, rezultuan të jenë viktimë e kuletë-patriotëve, të cilët idealin e vetëm e paskan pasur paranë. Këta urraaa-patriotët sot ndihen të tradhtuar nga kuletë-patriotët, të cilët, siç rezulton nga emisionet investigative, kanë arritur majat e pasurisë së tyre përrallore përmes rrjeteve të merimangës në stilin e cosa nostrës (në mos jenë edhe një hap më përpara), edhe atë të tradhtuar deri në asht, sepse me urraaaat e tyre në sokak, kanë kontribuar për dy dekada në ngritjen e një perandorie të kuletë-patriotëve, të cilët nuk ia dinë fundin pasurisë së tyre.

Si rrjedhojë, urraaa-patriotët po enden rrugëve të lagjeve tona si langaraçë, duke mos e ndier më as shiun e as diellin. Ata po vdesin, askush më nuk ka nevojë për shërbimin e tyre.
Çfarë zhgënjimi!

Teksa mutacionet në skenën politike vazhdojnë, më perfide, më të sofistikuara, më lineare në boshtin sintagmatik shoqëror, që kuletë-patriotët në fund të mund të shpëtojnë lëkurën e tyre të stërholluar nga shpërlarja e parave, të fituara në mënyrë të pistë dhe në kurriz të urraaa-patriotëve dhe në dëm të popullit, i cili sot mezi arrin ta mbajë frymën gjallë.

Zgjedhjet po afrohen dhe mutantët përsëri po bëhen bashkë, që përfundimisht ta çojnë në bankrot këtë popull të ngratë, i cili nuk di më as se ku e ka kokën.
Kurse saga e kuletë-patriotizmit, me gjasë do të vazhdojë edhe për një kohë të gjatë ta dominojë ekzistencën tonë kolektive, derisa ky vend të shndërrohet në djerrinë të tërësishme.
Dhe, s’do mend se ky ka qenë edhe misioni i kuletë-patriotizmit.

/ms