Vazhdon fluksi i shqiptarëve drejt Britanisë, për një javë 150 persona shkuan me gomone..

Numri i emigrantëve shqiptarë me gomone që bëjnë kalimin e rrezikshëm të Kanalit Anglez për të mbërritur në Britani ka njohur rritje javën e fundit, pas ngrohjes së motit.
Pasi shifrat ranë thuajse në zero gjatë muajve të dimrit, ato janë dyfishuar javën e kaluar. Duke ju referuar shifrave nga burime të Forcave Kufitare, DailyMail raporton se 150 emigrantë shqiptarë mbërritën në vetëm shtatë ditë.

Shifrat e fundit duket se realizojnë parashikimet e Home Office për një rigjallërim të trafikimit të qenieve njerëzore këtë pranverë, pasi numrat ranë në mënyrë dramatike gjatë muajve të ftohtë.

Në pesë muajt e parë të 2023 vetëm 151 shqiptarë kishin mbërritur në Britani, por tanimë kryeministri britanik, Rishi Sunak, ka motiv për t’u alarmuar, pasi gomonet po lundrojnë të pashqetësuara nga plani i tij për frenimin e emigracionit të paligjshëm, transmeton A2 përcjell albinfo.ch.

Shifrat e Home Office të publikuara sot treguan se 333 emigrantë, të të gjitha kombësive, kaluan në Kanal dje, duke e çuar totalin e këtij viti në 10.472, ndërsa në të njëjtësn pikë të vitit të kaluar shifra ishte 11.662.

/albinfo