URIME: Vendi i parë në garat Hackathon përsëri në duart e kërçovarëve

Një tjetër sukses i madh për talentet nga Kërçova! Liza Zenku, Albin Fejza dhe Shpat Dinarica kanë rrëmbyer vendin e parë në garat prestigjioze Hackathon, të cilat këtë vit u zhvilluan me fokus në “Leveraging of LLMs” (Shfrytëzimi i Modeleve të Mëdha të Gjuhës) me një projekt që duhej realizuar brenda 8 orëve.

Ekipi fitues u prezantua me një projekt inovativ për sistemin e shkeljeve të trafikut në Maqedoninë e Veriut. Ky sistem inteligjent synon të automatizojë procesin e identifikimit dhe menaxhimit të shkeljeve rrugore, duke shfrytëzuar fuqinë e inteligjencës artificiale. Zgjidhja e tyre jo vetëm që përmirëson efikasitetin e sistemit aktual, por gjithashtu kontribuon në sigurinë rrugore dhe transparencën e gjobave të trafikut.

Fitorja e këtij ekipi është një dëshmi tjetër e potencialit të jashtëzakonshëm të inovatorëve kërçovarë në fushën e teknologjisë. Ata arritën të dallohen mes dhjetëra ekipeve pjesëmarrëse falë një ideje të guximshme, implementimit të saktë dhe ndikimit të madh që projekti i tyre mund të ketë në realitetin e përditshëm.

Rikujtojmë se para disa muajsh një grup tjetër kërçovar “Brumi”, fitoi garat në Hackathon në një projekt 1-javor!
Suksese!

/tvgurra