Urime: Doktoron Agron Vrangalla

Një arritje modeste por e veçantë në jetë. Asgjë e jashtëzakonshme, por një objektiv i realizuar me shumë sakrifica (si të gjithë të tjerët që kanë kaluar nëpër këto ujëra). Një amanet i lënë nga disa njerëz të dashur që nuk ndodhen më në këtë botë.

E them me bindje të plotë dhe po të doni të vërtetuar edhe shkencërisht😊: Nuk ka arritje individuale, as suksese personale, as kënaqësi teke. Ka vetëm përputhje të rrethanave, njerëzve, fateve, shanseve, hapësirës e kohës, momenteve, inspirimeve e orientimeve, mbështetjeve morale e emocionale të miqve të dashur, tolerancë dhe mirëkuptim nga familja, gjendjes shëndetësore, kushteve financiare, përqafime e dashuri, xhelozi e kurthe, motive e iluminime. Fundja duhet të të jepet shansi për jetë…

Puna jote? Lufta jote? Konsistenca, persistenca e koherenca? Mosdorëzimi, kontributi yt? Hahaha. Po mor po, ka rëndësi edhe kjo. Vetëm 2% e gjësë. Normale, pa këtë pjesë nuk plotësohet mozaiku.

Për çdo arritje në jetë, përkulem para Krijuesit. Shkaqet e Tij, ngushtimi i rrugës që të çon me ngulm drejt asaj që duhet të ndodhë me patjetër, njerëzit e zemrës që ndonjëherë besojnë tek unë më shumë se unë te vetja…

Mirënjohës e falënderues ndaj të gjithëve. Ju më burrnoni. Lista është e gjatë, s’kam si e ndaj, por kam si e ndjej. E ju e dini se e ndjej thellë e fuqishëm.

Nuk premtoj se do të mund të jua kthej gjithë atë që bëni për mua, por ju premtoj këtë tjetrën: Do bëj të njëjtën gjë për ata që do të kenë nevojë për ndihmën time. Trashëgimia e humanizmit ndër breza është më e çmuar se ajo e shkëmbimit formal të ndereve e qokave, mendoj unë.
Ja kështu miq.
Jam pak i lodhur, po shkoj të bëj një sy gjumë. Shkruan Dr. Agron Vrangalla në Facebook.

/ms