U shkëput edhe një ‘mohikan’ i madh shqiptar nga toka e Linkoln-it. Shkruar nga Ramazan Bekteshi

Më 25 mars 2025 në Wisconsin, SHBA kaloi në amshim Ismail Shabani, njëri ndër emigrantët e parë shqiptar nga Kërçova e që në moshë të re i vuri vetes mbi supe barrën e çështjes Kombëtare. Ky patriot e nacionalist, një jetë ia përkushtoi çështjes shqiptare me idealin sublim të Balllit Kombëtar të bashkimit të trojeve shqiptare.

Restauranti i suksesshëm i familjes Shabani në zemër të Çikagos, i udhëhequr nga Ismaili i shtoi një aneks atij duke krijuar konakun shqiptar ku bashkatdhetarët e të gjitha trojeve shqiptare hanin e pinin falas, i gjenin punët, dhe mbanin zjarrin patriotik në kulm të lavdisë. Në këtë konak frekuentuan shumë patriotë shqiptar, u mblodhën shumë ndihma për nevojtarët e për kauzën kombëtare, u bënë shumë lobime e fushata, u krijuan shume miq në Kongres e Senat.

Aty vinte patrioti i madh, Luan Gashi, aty u miqësua me familjen Shabani edhe Ukshin Hoti, aty frekuentonin patriotët Ethem Selimi, Sulejman Elezi e Imer Krotka, aty bëheshin edhe shume takime me personalite të rëndësishme me influencë të jetës politike amerikane.

Ismail Shabani veprimtarinë e tij e bënte pa pompozitet duke e angazhuar tërë potencialin e kësaj familje të madhe patriotike në shërbim të çështjes kombëtare, Shqipërisë etnike dhe pavarësisë së Kosovës.

Udha e Ismailit është një kontribut i rrallë me plotë sakrifica me të gjithë familjen e madhe Shabani, është një testament për brezat e ardhshëm, dhe shembull tipik i përkushtimit për shqiptarinë.

Nderimet e fundit për Ismail Shabanin do të mbahen më 27 mars prej orës 16:00- 20:00 te Qendra Shqiptare në Çikago, Berkeley, Illinois, derisa, varrimi do të bëhet në vendlindjen e tij në Kërçovë.

/ms