U përpoqën ta shpëtojnë Mijallkovin?! Grubi dhe Bexheti “non grata” në SHBA (VIDEO)
Për shkak se janë përfshirë në ryshfet për të minuar proceset gjyqësor që lidhet me lëndët e ish-shefit të DSK-së Sasho Mijallkov, Departamenti Amerikan i Shtetit vendosi që t’i shpallë persona të padëshiruar dhe t’i fusë në listën e zezë ish-zëvendëskryeministrin e parë Artan Grubi dhe gjykatësin e apelit Enver Bexhetin.
“Në bazë të nenit 7031(c), Departamenti i Shtetit cakton publikisht Artan Grubin dhe Enver Bexhetin për përfshirjen e tyre në korrupsion të konsiderueshëm duke pranuar ryshfet për të minuar proceset gjyqësore të lidhura me dënimin penal të Sasho Mijallkov, drejtor i Drejtorisë për Siguri të Maqedonisë së Veriut dhe Kundërzbulimi”, thonë nga Departamenti Amerikan i Shtetit.
Me këtë, në listën e zezë amerikane janë futur edhe anëtarët e ngushtë të familjes së Grubit, kumtoi stejt departamenti.
Në një postim të tij në Facebook, ish-zëvendëskryeministrit nga radhët e BDI-së, Artan Grubi, shtoi se jetën publike ia ka kushtuar mbrojtjes së vlerave demokratike perëndimore dhe që gjithmonë ka punuar me përkushtim për anëtarësimin e vendit në NATO dhe BE, andaj siç shton, ky vendim e prek drejtpërdrejt dhe personalisht.
“Do të angazhohem me gjithë përkushtimin, së bashku me miqtë dhe partnerët tanë, me të cilët kemi ndarë vizionin dhe punuar ndër vite për integrimin e vendit në strukturat euroatlantike, për të zbardhur plotësisht këtë çështje. Transparenca dhe përkushtimi ndaj vlerave demokratike do të vazhdojnë të jenë shtylla kryesore e çdo veprimi tim”, shkruan Artan Grubi – ish-zëvendëskryeministër – BDI.
Artan Grubi është zyrtari i tretë nga BDI që futet në listën e zezë amerikane. Para tij “non grata” ishin shpallur Xhevat Ademi dhe kryetari i Strugës Ramiz Merko.
Grubi shpallet i padëshiruar për përzierje në proces gjyqësor që lidhet me një figurë që po ashtu është në listën e zezë amerikane, Sasho Mijallkov, i cili u fut në këtë listë në vitin 2022 për korrupsion të konsiderueshëm sipas nenit 7031(c).
Personat nga Maqedonia e Veriut që janë “non grata” për SHBA-të janë të shumtë: ish-kryeministri Nikolla Gruevski, ish-zëvendëskryeministri dhe biznesmeni Koço Angjushev, kreu i PDSH-së Menduh Thaçi, ish kryeprokurorja speciale Katica Janeva, kryetari i Karposhit Stevçe Jakimovski, bashkëshortët Samsonenko si dhe nënë e bir – Ratka dhe Orce Kamçev.
VIDEO:
/tv21
){kind=link}