Tv Gurra: “Vjeshta e Dytë” – një manifestim plot ngjyra në Kalanë e Qytetit të Kërçovës

Në një atmosferë plot gjallëri e frymë krijuese, Shkolla Fillore “Sande Shterjoski” organizoi manifestimin tradicional “Vjeshta e Dytë”, i cili këtë vit u mbajt në një vend simbolik dhe historik — në kalanë e qytetit të Kërçovës.

Ngjyrat e stinës, buzëqeshjet e nxënësve dhe energjia e tyre pozitive e mbushën hapësirën me ndjenjën e gëzimit dhe dashurisë për natyrën. Fëmijët prezantuan punime të ndryshme artistike, poezi, këngë e valle, duke e kthyer këtë ditë në një festë të bukurisë dhe kreativitetit.
Në fjalën e tij përshëndetëse, drejtori i shkollës, z. Bekim Jusufi, theksoi rëndësinë e ruajtjes së traditës së këtij manifestimi dhe vlerësoi përkushtimin e nxënësve dhe mësuesve.

“Këtë herë vjeshtën po e sjellim me më shumë ngjyra dhe ndryshe,” – u shpreh drejtori Jusufi, duke shtuar se shkolla do të vazhdojë të mbështesë çdo nismë që nxit krijimtarinë dhe bashkëpunimin ndërmjet nxënësve, prindërve dhe mësuesve.

Ai gjithashtu falënderoi prindërit për mbështetjen e tyre të pandërprerë, duke theksuar se “falë bashkëpunimit të tyre, fëmijët kanë mundësinë të rriten, të mësojnë dhe të ndjekin ëndrrat e tyre me besim e guxim.”

Manifestimi “Vjeshta e Dytë” dëshmoi edhe një herë se arsimi dhe kultura mund të bashkohen në mënyrë të mrekullueshme, duke e kthyer kalanë e qytetit në një skenë të hapur për talentet e reja të Kërçovës.

/tvgurra