Tv Gurra: Skënderbeu “zbret” në Garanë – më 28 Nëntor zbulohet busti monumental 6-metërsh (VIDEO)

Garana dhe gjithë Kërçova po përgatiten për një nga ngjarjet më të rëndësishme kulturore dhe historike të viteve të fundit. Më 28 Nëntor, në orën 13:00, në qendër të fshatit do të inaugurohet busti monumental i Gjergj Kastrioti Skënderbeut, me lartësi gjashtë metra, vepër e skulptorit të njohur Fiqiri Kasa. Ky monument, i pari i kësaj përmase në rajon, pritet të mbledhë të ftuar nga të gjitha trojet shqiptare dhe diaspora.

Hapësira përreth bashkisë së fshatit është rinovuar plotësisht, duke marrë një pamje moderne dhe funksionale. I gjithë projekti, me vlerë rreth 300 mijë euro, është realizuar në baza vullnetare, duke dëshmuar fuqinë e bashkimit dhe solidaritetit të komunitetit.

Nisma për rregullimin e bashkisë erdhi nga afaristi Mefail Ibishi, i njohur për mbështetjen e projekteve kulturore dhe shoqërore. Ideja që busti i Skënderbeut të vendosej në zemër të fshatit u inicua dhe u shty përpara me vendosmëri nga veprimtari Bali Koci Kontribut të rëndësishëm ka dhënë edhe mërgata, përmes shoqatave dhe aktivistëve në diasporë, si edhe rinia lokale.

Punimet për finalizimin e këtij projekti madhështor po udhëhiqen nga këshilli organizativ i kryesuar nga Valbon Aliu, i cili po e çon me sukses drejt përfundimit.

Ky monument nuk është vetëm një vepër arti, por një akt identiteti dhe krenarie kombëtare. Me inaugurimin e tij, Garana po shndërrohet në një qendër simbolike të shqiptarisë në RMV, duke e festuar 28 Nëntorin me madhështi dhe dinjitet.

VIDEO:

/tvgurra