Tv Gurra: ShMK “Drita” Kërçovë shkëlqen në Erasmus+ me mesazhin global: “Say No to Addictions”
Shkolla e Mesme Komunale “Drita” në Kërçovë ka arritur një sukses të rëndësishëm ndërkombëtar, duke përfunduar me sukses pjesëmarrjen në projektin prestigjioz Erasmus+, me temë: “Say No to Addictions” (Thuaj jo varshmërive).
Një grup nxënësish të përzgjedhur, nën mentorimin e profesorëve Baftir Limani dhe Gëzim Qerimi, morën pjesë aktive në aktivitetet e zhvilluara në Zagreb të Kroacisë. Projekti bashkoi të rinj nga Spanja, Letonia, Maqedonia e Veriut dhe Kroacia, duke krijuar një platformë të fuqishme për shkëmbimin e ideve, praktikave më të mira dhe zgjidhjeve inovative kundër varshmërive moderne – teknologjike, sociale apo substancave të dëmshme.
Nxënësit e ShMK “Drita”: Shaban Çupi, Erjon Jusufi, Sinan Imeri, Elsa Selimi, Jona Ballazhi, Abian Sula, Nexhbije Lika, Gerta Ballazhi, Dea Baftiri dhe Aniol Bekteshi, u shquan për profesionalizëm, pjekuri dhe ndërgjegjësim të lartë. Ata:
Prezantuan hulumtime lokale mbi varshmëritë dhe ndikimin e tyre në komunitetin e Kërçovës;
Morën pjesë aktive në punëtori praktike dhe diskutime ndërkulturore;
Bashkëpunuan për realizimin e materialeve ndërkombëtare, udhëzuesit për parandalimin e varshmërive dhe videove sensibilizuese në kuadër të nismës “Say No to Addictions”.
Në mbrëmjen ndërkulturore, nxënësit tanë prezantuan me krenari veshjet tradicionale dhe kulturën e Kërçovës, duke fituar vëmendjen dhe respektin e pjesëmarrësve nga vendet e tjera.
ShMK “Drita” Kërçovë shpreh mirënjohje dhe krenari për arritjet e nxënësve dhe mentorëve. Ky projekt jo vetëm që pasuroi përvojën edukative, por gjithashtu e pozicionoi shkollën si një institucion lider që promovon vlera, përgjegjësi dhe ndërkombëtarizim.
/tvgurra
