Tv Gurra: Kandidatë shqiptarë në garë për Kërçovën – pritshmëri për fushatë me programe konkrete

Në Kërçovë, tre kandidatë shqiptarë – Fatmir Dehari, Shkodran Alili dhe Fatmir Limani – kanë shpallur garën për zgjedhjet lokale, megjithëse fushata ende nuk ka nisur zyrtarisht.

Të tre tashmë kanë filluar aktivitetet e tyre në terren, duke u takuar me qytetarët dhe duke prezantuar idetë e para për drejtimin e komunës.

Qytetarët kërkojnë që kësaj radhe gara të mos zhvillohet me ofendime, akuza dhe përçarje, por me programe konkrete që japin zgjidhje për problemet reale: infrastrukturën, shëndetësinë, arsimin, pastrimin, qentë endacakë dhe zhvillimin ekonomik.

Shumë theksojnë se pas rrethit të parë të votimit, do të duhet bashkëpunim dhe unitet, në mënyrë që kandidati shqiptar që hyn në balotazh të ketë mbështetjen e plotë të qytetarëve pa dallime partiake.

Kjo garë shihet si një mundësi e rëndësishme për të sjellë transparencë, përgjegjësi dhe zhvillim në Kërçovë, duke u fokusuar në interesin e përbashkët të gjithë banorëve të saj.

/tvgurra