Tv Gurra: Fjalimi i Fatmir Limanit në Kërçovë pas shpalljes së rezultateve të zgjedhjeve (VIDEO)

Është krejt e qartë se votuesit shqiptarë kanë shprehur një vlerësim relativisht të qëndrueshëm për kryetarin ekzistues. Kjo vlen si për rezultatet e tij në komunë, ashtu edhe për figurën e tij morale dhe politike, pavarësisht çdo skeme për të ruajtur votën në favor të tij, me ndihmën e kandidatëve të tjerë.

Ky rezultat shumë kërçovarëve -mund t’u duket i padrejtë, i pamoralshëm apo miopik, por populli foli, ashtu si di ai. Ndonjëherë popujve u duhet njëfarë kohe derisa të lëvizin gjethet dhe të duket trungu.

Unë jam zotuar që në fillim të fushatës për atë çfarë përfaqësoj si familje dhe si politikan, do të ndihmoja çdo kandidat shqiptar që do të arrinte në raundin e dytë. Kjo ka ndodhur para se të shfaqeshin disa lajme që cënojnë figurën e kandidatit fitues mes shqiptarëve.

Besoj se duke vepruar kështu kam mbajtur premtimin tim, duke mos përdorur asnjë dobësi morale të askujt, në emër të ruajtjes së qetësisë së më të vegjëlve. Jam luftëtar, që në ring shoh të godas drejt dhe përpara, e jo poshtë, nën brez. Me këtë veprim, ndjehem se kam përmbushur zotimin tim para mërgatës në Zvicër.

Ndërkohë, unë dola në fushatë me qëllimin për të ndryshuar Kërçovën. Nuk mund ta bëj këtë pa votën e qytetarëve. Nëse ata zgjedhin dikë tjetër në vendin tim, kjo do të thotë se ata besojnë se ai është në gjendje të sfidojë kandidatin maqedonas.

Përgjegjësia është e atyre që besojnë këtë, jo imja. Për të gjitha këto arsye, më është e vështirë të bëj thirrje për të votuar pro tij. Unë do bëj thirrje të votohet më i miri, duke besuar se këtë herë qytetarët në tërësinë e vet, do dinë të votojnë, duke peshuar gjithçka. Ndaj në këto rrethana të reja, ndjej se zotimi im është i përmbushur. Ndaj mund të them se në këto rrethana e për këto arsye kuptoj se populli vetë zgjodhi dikë që do të ketë të vështirë të rezistojë përballë kandidatit maqedonas.

Ndërkohë, unë do të vazhdoj me punësimet për të cilat jam zotuar, me projektet në favor të Kërçovës, pavarësisht se kë voton qytetari i Kërçovës, në raund të dytë!
I mëkuar me Rilindjen dhe rilindasit që në barkun e nënës, do bëj thirrje që të lexojmë ata, në çdo moshë! Kështu do kuptojmë veten e veset tona, por dhe të tjerët! Fishta më vjen në mend i pari… çdo kohë është e mirë për Rilindje!

VIDEO:

/tvgurra