Tv Gurra: Fatmir Limani – Nga burgjet e rezistencës te skena politike

Fatmir Limani u lind në vitin 1973 në Kërçovë, në një familje me tradita bujare e atdhetare. Shkollën fillore dhe dy vitet e para të gjimnazit i kreu në vendlindje, por u përjashtua pas akuzave se kishte shpërndarë afishe me mbishkrimin “Duam shkolla shqip”. Studimet e shkolles se mesme i përfundoi në Prishtinë, ku më pas nisi Fakultetin Filozofik – Dega e Historisë, periudhë e trazuar nga demonstratat studentore. Pas dëbimit nga Kosova, i vijoi studimet në Universitetin e Tetovës.

Për shkak të angazhimit të tij kombëtar, u përball me burgosje dhe dhunë. Në atë kohë humbi babain, Beqirin, i cili u vra mizorisht nga policia, ndërsa tre vëllezërit e tij u arrestuan.
Vetë Fatmiri kaloi vite të rënda në burgjet e Maqedonisë së atëhershme. Në vitin 1998 u rrëmbye nga Shërbimi i Sigurimit dhe u dënua me 14 vite burg.

Pas një periudhe hetuesie dhe izolimi, u lirua në mars 2002, falë amnistisë pas përfundimit të konfliktit të armatosur.
Pas lirimit, botoi veprat “Rruga për te shpirti i popullit” dhe “Nga burgu në burg”, duke sjellë përvojat e tij në poezi dhe prozë. Ai themeloi Lëvizjen “Ndryshe”, ishte pjesë e shoqatave kombëtare dhe anëtar i Shoqatës së Veteranëve të Luftës. Në periudhën 2007–2011 ishte anëtar i Këshillit Mbikëqyrës të MEPSO, ndërsa 2011–2021 zv. drejtor i përgjithshëm i ELEM.

Në vitin 2021 shpalli kandidaturën e tij të pavarur për kryetar të Komunës së Kërçovës. Që nga viti 2022 është nënkryetar i Lëvizjes BESA dhe prej vitit 2024 ushtron detyrën e Ministrit për Politikë Sociale, Demografi dhe Rini. Fatmiri jeton në Kërçovë, është i martuar dhe baba i dy fëmijëve.

/tvgurra