Tv Gurra: E nderuar diasporë kërçovare në Zvicër ! Shkruan Raschit Limani

Me afrimin e zgjedhjeve lokale në RMV, po vërehet një lloj acarimi mes palëve që mbështesin njërin kandidat apo tjetrin.
Mendoj se kjo dukuri nuk është e shëndetshme për të ardhmen e Kërçovës.

Çdo njeri ka të drejtë të mbështesë atë kandidat që mendon se është më i miri, por kjo nuk i jep të drejtë askujt të ofendojë të tjerët që nuk janë përkrahës të të njëjtit kandidat. Prandaj edhe zgjedhjet konsiderohen si forma më e lartë e demokracisë.

Për më tepër, ne si diasporë kërçovare duhet ta pranojmë se nuk i njohim në detaje problematikat dhe rrethanat politike, sociale e ekonomike atje, sepse nuk e ndjejmë jetën e përditshme me të cilën ballafaqohen qytetarët në Maqedoninë e Veriut. Ajo çka dimë dhe ajo çka pritet prej nesh është të shkojmë dhe të votojmë në mënyrë masive, me qëllim që Kërçova të vazhdojë të frymojë shqip. Ky është misioni ynë i përgjithshëm.

Debatet dhe dallimet politike janë normale para zgjedhjeve, por pasi të përfundojnë ato, të gjithë duhet të bëhemi bashkë, sepse vetëm në këtë mënyrë mund të dëshmojmë pjekurinë tonë si qytetarë të përgjegjshëm.

Ne jemi një trung, një komb, një familje. Nëse sot kemi tre kandidatura në Kërçovë, kjo nuk na jep të drejtë të ndahemi deri në atë pikë sa nesër të mos i flasim njëri-tjetrit.

Analizat politike le t’ua lëmë ekspertëve dhe analistëve, ndërsa ne si diasporë duhet të bëjmë atë që kemi bërë gjithmonë: të votojmë masivisht dhe të zgjedhim një kryetar shqiptar!

/tvgurra