Tubim madhështor i Shoqatës Kulturore “Kërçova – Zvicër” në mbështetje të kandidaturave shqiptare për Kërçovën

Në një atmosferë të jashtëzakonshme dhe organizim superior, Shoqata Kulturore “Kërçova – Zvicër” organizoi një tubim madhështor ku çdo detaj ishte menduar me profesionalizëm të lartë.

Ky aktivitet u zhvillua me rastin e promovimit të kandidaturave për mandatin e ri komunal, duke sjellë para bashkëatdhetarëve një debat të hapur, të sinqertë dhe me shumë vlerë demokratike.
Në krye të aktivitetit qëndroi drejtuesi i shoqatës z. Resul Mehmedi, i cili me mençuri dhe maturi udhëhoqi gjithë ngjarjen.

Pjesa më e mirëpritur e mbrëmjes ishte pyetja drejtuar kandidatëve nëse, në rast se humbin në raundin e parë, do të bashkohen për të mundësuar që “Kërçova të frymojë shqip” – një mesazh që ngjalli duartrokitje të fuqishme nga të pranishmit.

I pari që mori fjalën ishte kandidati i pavarur z. Shkodran Alili, i shoqëruar nga bartësi i listës z. Kujtim Kasami dhe një këshilltar, të cilët prezantuan projektet e tyre zhvillimore për komunën.

Pas një pauze të shkurtër, fjalën e mori ministri z.Fatmir Limani, i cili në panel kishte znj. Teuta Ahmedi Purellku dhe një ekip profesionistësh nga fusha të ndryshme. Çdonjëri prej tyre foli për sektorin përkatës, duke lënë përshtypje të forta si ekip i përkushtuar dhe me vizion të qartë.

Në një sallë gjithnjë e më të mbushur dhe me atmosferë entuziaste, mori fjalën kryetari z. Fatmir Dehari, i shoqëruar nga bartësi i listës z. Ilir Rushani dhe një këshilltar. Në adresimin e tij, z. Dehari foli për sfidat dhe arritjet gjatë qeverisjes së tij, si dhe theksoi rëndësinë e bashkëpunimit ndërmjet forcave politike shqiptare për të mirën e përbashkët të Kërçovës.

Shoqata “Kërçova – Zvicër” meriton mirënjohje për organizimin e përkryer, përfshirjen e të gjitha shoqatave kërçovare që veprojnë në Zvicër, si dhe për mundësinë që u dha mediave, përfshirë TV Gurrën, e cila e përcolli këtë event me profesionalizëm dhe transmetim LIVE për të gjithë kërçovarët.

/tvgurra