Trump: Palestinezët të zhvendosen në Egjipt dhe Jordani, në Gaza do të vdesin..!
Donald Trump priti sot në Shtëpinë e Bardhë kryeministrin e Izraelit, Benjamin Netanyahu. Ata zhvilluan edhe një bashkëbisedim me gazetarët. Trump i është rikthyer temës së nxehtë të Gazës. Presidenti amerikan pretendon se qeveria saudite nuk po bën presion për krijimin e një shteti palestinez, raporton BBC.
Ai po ashtu argumenton se populli palestinez i Rripit të Gazës duhet të zhvendoset në Egjipt dhe Jordani – pavarësisht komenteve nga liderët e atyre vendeve arabe që sugjerojnë të kundërtën.
Trump thotë se edhe vendet e tjera do të pranojnë palestinezë, por nuk specifikoi se për cilat vende e kishte fjalën.
“Kemi të bëjmë me njerëz shumë kompleks,” thotë ai.
Ai sugjeron se “paratë e ofruara nga njerëz të tjerë, kombe shumë të pasura”, do të lejojnë palestinezët të rivendosen në deri në gjashtë vende të ndryshme.
“Gaza është një garanci se ata do të përfundojnë duke vdekur”, paralajmëron Trump.
Ai thekson se banorët duan të largohen nga Gaza dhe të mos kthehen kurrë më pas.
“Banorëve të Gazës duhet t’u jepet tokë diku tjetër, sepse ata nuk mund të kthehen atje. Ka shumë zjarre, por ne do t’i shuajmë,” u tha ai gazetarëve, duke paralajmëruar përfundimin e konflikteve në botë.
“Gaza ka patur vdekje për dekada të tëra”
Duke folur me gazetarët në nënshkrimin e një urdhri ekzekutiv përpara takimit të tij me Netanyahun, Trump tha se palestinezët duhet të lëvizin sepse “çështja e Gazës nuk ka funksionuar”.
“Unë mendoj se ata duhet të marrin një tokë të mirë, të freskët dhe të bukur, dhe ne i detyrojmë disa njerëz që të mbledhin para për ta ndërtuar dhe për ta bërë të bukur dhe për ta bërë të banueshme dhe të këndshme,” tha ai. “Unë mendoj se do të ishte shumë më mirë sesa të ktheheshim në Gaza, e cila ka pasur vetëm vdekje për dekada.
Trump sugjeroi se ato “copa toke” mund të jenë në Egjipt ose Jordani. I pyetur nga një gazetar nëse kjo do të përbënte zhvendosjen me forcë të njerëzve nga Gaza, Trump pohoi se nëse banorët e Gazës do të kishin një mundësi për t’u larguar, “ata do të donin ta bënin”.
“Ata janë atje sepse nuk kanë alternativë. Çfarë kanë? Është një grumbull i madh rrënojash tani. Dua të them, i keni parë fotot?”
Vendet e Lindjes së Mesme kanë refuzuar vazhdimisht propozimet për transferimin e personave të zhvendosur nga Gaza, duke paralajmëruar se një veprim i tillë do të kërcënonte stabilitetin rajonal.
Duke folur me gazetarët më herët, zyrtarë të lartë të administratës se Trump refuzuan pretendimet se presidenti amerikan donte të zhvendoste me forcë njerëzit nga Gaza. Në vend të kësaj, thanë ata, Trump donte ta bënte Gazën “të banueshme”, duke shtuar se rindërtimi i zonës mund të zgjasë 10 deri në 15 vjet për shkak të dëmtimit pas 15 muajsh lufte me forcat izraelite.
/pacensur
