Trump: Irani mund të drejtohet edhe nga një lider fetar, mjafton të trajtojë mirë SHBA-në dhe Izraelin

Presidenti i SHBA-së, Donald Trump, deklaroi se lidershipi iranian është “neutralizuar” dhe se ai po kërkon një udhëheqës të ri për Iranin që do të trajtojë mirë Shtetet e Bashkuara dhe Izraelin, edhe nëse ky nuk është një lider i një shteti demokratik.

Në një intervistë të shkurtër telefonike për CNN, Trump tha se situata në Iran ka ndryshuar ndjeshëm në një kohë shumë të shkurtër.

“Irani nuk është i njëjti vend që ishte një javë më parë. Një javë më parë ata ishin të fuqishëm dhe tani janë neutralizuar vërtet”, u shpreh ai.

Trump shprehu gjithashtu besim se zgjedhja e një udhëheqësi të ri do të jetë e lehtë dhe tha se dëshiron të jetë i përfshirë në këtë proces. Ai e krahasoi situatën me Venezuelën, ku sipas tij SHBA-të kapën në fillim të këtij viti presidentin Nicolás Maduro dhe vendosën në pushtet zëvendësen e tij, Delcy Rodríguez.

“Do të funksionojë shumë lehtë. Do të funksionojë siç funksionoi në Venezuelë. Kemi një udhëheqëse të mrekullueshme atje. Ajo po bën një punë fantastike. Dhe do të funksionojë njësoj si në Venezuelë”, tha ai.

Presidenti amerikan tha gjithashtu se është i hapur që Irani të drejtohet edhe nga një lider fetar. “Epo, mund të jem po, dua të them, varet se kush është personi. Nuk më shqetësojnë udhëheqësit fetarë. Kam të bëj me shumë udhëheqës fetarë dhe ata janë fantastikë”, u shpreh Trump.

I pyetur nëse këmbëngul që Irani të jetë një shtet demokratik, Trump tha për CNN se ajo që ka rëndësi është që vendi të ketë një udhëheqës të drejtë.

“Jo, unë po them se duhet të ketë një udhëheqës që do të jetë i drejtë dhe i ndershëm, të bëjë një punë të shkëlqyer, të trajtojë mirë Shtetet e Bashkuara dhe Izraelin dhe të trajtojë mirë vendet e tjera në Lindjen e Mesme – të gjithë janë partnerët tanë”, deklaroi ai.

Trump gjithashtu vlerësoi marrëdhëniet e tij me vendet e Lindjes së Mesme, duke pretenduar se ato “po luftojnë për ne”. Ai akuzoi ish-presidentët amerikanë Joe Biden dhe Barack Obama se kishin prishur marrëdhëniet me vende si Arabia Saudite, Emiratet e Bashkuara Arabe dhe Katari, duke shtuar se gjatë presidencës së tij këto vende u bënë partnere të afërta të SHBA-së.

Duke komentuar operacionin ushtarak kundër Iranit, Trump e vlerësoi atë si një sukses shumë të madh. Ai sugjeroi gjithashtu se nuk është i shqetësuar për rritjen e çmimeve të gazit, duke thënë se çdo rritje do të jetë afatshkurtër dhe se do të bjerë shpejt. Sipas tij, operacioni ka goditur rëndë edhe marinën iraniane.

“E kemi rrëzuar Marinën e tyre, sepse kur e rrëzon Marinën ata nuk mund të bëjnë atë që donin të bënin. Marina është pothuajse – sapo kemi arritur shifrën e 25-të. A mund ta imagjinoni këtë? Të mëdha – 25 anije janë rrëzuar”, deklaroi Trump.