Trump Coin: Mundësi investimi apo marketing politik..!?

Në vitin 2008 botës iu prezantua një valutë e re virtuale që, duke përdorur teknologjinë blockchain, mundësonte transaksione prej një përdoruesi tek tjetri pa një autoritet qendror. Kjo valutë virtuale njihej si “Bitcoin”. Sot, ky është një nga termet më të zëshme që e din çdo njeri që merret me këtë teknologji, ose vetëm ka dëgjuar se është diçka që vlen mijëra dollarë. Vetëm për krahasim, në vitin 2010 për dy pica të mëdha do t’ju duheshin mijëra bitcoin-e, shkruan Meta.mk, transmeton Portalb.mk.

Bota e kriptovalutave po rritet çdo ditë dhe po bëhet gjithnjë e më e zakonshme dhe atë në shumë aspekte: çdo ditë mbijnë kriptovaluta të reja, të ashtuquajturat Tokenë NFT (token i pandërrueshëm), teknologji të reja të blockchain. Ndërsa shumë kriptovaluta përkrahë Bitcoin-it, si Ethereum, XRP, Tether, Cardano, Pi, Solana, tregtohen në mënyrë aktive dhe mbijetojnë, një numër i madh i tyre përfundojnë në pakthim në më pak se 24 orë.

Më 17 janar të vitit 2025 vetëm disa ditë para inaugurimit të tij Presidenti i SHBA-ve Donald Trump befasoi duke lëshuar në qarkullim dy kriptovaluta të reja – Trump Coin ($TRUMP) dhe Melania Coin ($MELANIA). Pa njoftim paraprak kjo gjë fillimisht shkaktoi skepticizëm, por disa orë më vonë Trump e konfirmoi personalisht projektin përmes rrjeteve sociale X dhe Truth Social, duke shfaqur një karikaturë të Trump me grushtin e tij të ngritur- një simbol i qëndrueshmërisë së tij pas atentatit në korrik të vitit 2024.

Imagjinoni se si presidenti i ri amerikan krijoi një “meme coin” që është e vërtetë. Vetëm pak minuta pas lëshimit, kur askush nuk dinte asgjë për këtë, dikush investoi menjëherë një milion dollarë në këtë token. Nëse e citojmë Presidentin, “një kredi e vogël prej 1 milion dollarësh”. Spekulimet ishin gjithmonë se ky mund të jetë vetë Elon Musk, por supozohet se ai është dikush që e dinte saktësisht se çfarë do të ndodhte me këtë meme coin.

Popullariteti i Trump Coin-it shpërtheu. Në më pak se 24 orë vlera e tij u rrit me 1010%, duke arritur një çmim prej 75.35 dollarësh, me një kapital total tregu prej 58 miliardë dollarësh. Disa investitorë investuan menjëherë miliona dollarë, duke besuar se monedha do të vazhdojë të rritet. Megjithatë, monedha pësoi luhatje të mëdha dhe humbi më shumë se 80 përqind të vlerës së saj në një kohë të shkurtër, që shkaktoi humbje të konsiderueshme për shumë njerëz.

Kjo luhatje e shpejtë tërhoqi kritika nga anë të ndryshme, me çka disa analistë e krahasojnë atë me një skemë “pump and dump”, ku promovuesit e hershëm bëjnë fitime në kurriz të investitorëve të mëvonshëm.

Përderisa Trump Coin mori mbështetje dërrmuese, fati i Melania Coin ishte krejtësisht i ndryshëm. Menjëherë pas lëshimit çmimi i $MELANIA ra menjëherë për 95%, duke i lënë investitorët vulnerabil me humbje të mëdha. Problemi kryesor ishte mbështetja e pamjaftueshme dhe dyshimet për qëllimin e saj. Burimet zyrtare pretendonin se monedha ishte e lidhur me nisma humanitare, por mungesa e transparencës shkaktoi mosbesim dhe tërheqje masive të mjeteve. Kjo rënie e shpejtë e theksoi paqëndrueshmërinë e kriptovalutave meme dhe rreziqet që ato mbartin.

Nëse hapni faqen zyrtare të internetit “gettrumpmemes.com”, ju mirëpret një portret i madh i Trump-it. Ju keni mundësinë për të blerë token me kartën tuaj të debitit ose me një kriptovalutë tjetër. Nga Maqedonia, nuk keni akses në asnjërën nga metodat e ofruara, por mund të vazhdoni më tej përmes një Rrjeti Virtual Privat (VPN). Shfaqet një thënie interesante, që thotë – “Memet Trump janë të dedikuara si shprehje e mbështetjes dhe pajtimi me idealet dhe besimet që përfaqëson simboli $TRUMP dhe nuk synojnë të jenë një mundësi investimi, kontratë investimi ose letra me vlerë të çfarëdo lloji. “GetTrumpMemes.com” nuk ka lidhje politike me asnjë fushatë politike, funksion politik ose agjenci qeveritare.”

Si funksionon Trump Coin?
Trump Coin është një Token në “Blockchain Solana” dhe në fakt monedha ndikon plotësisht në gjithçka që ndodh me Solana-n. Edhe pse të dyja janë monedha të veçanta, Solana përjetoi një rritje të madhe në vlerë në momentin kur u shpall dhe u prezantua monedha Trump Meme. Kjo është arsyeja pse Solana tani kryeson në mesin e kriptovalutave më të njohura.

Të gjitha kriptovalutat meme nuk krijojnë teknologjitë e tyre blockchain, por ndërtojnë mbi ato ekzistuese. Dhe ata pothuajse gjithmonë bazohen në teknologjitë e ofruara nga Solana dhe Ethereum. Krijuesit e Memeve nuk duan të kodojnë dhe të bëjnë teknologji të tyret.
Monedha u krijua nga i njëjti ekip që krijoi NFT-të e para zyrtare në vitin 2022, ku Trump u paraqit duke mbajtur Bitcoin në dorë, i veshur me atlete ari, një Trump Boksier dhe duke u portretizuar si më i miri i të gjitha kohërave.

Aktualisht, oferta totale e Trump Coin është i kufizuar në 1 miliardë tokenë. Kjo do të thotë se do të ketë përgjithmonë vetëm 1 miliard tokenë që do të mund të blihen. Por gjatë krijimit dhe lëshimit të projektit u ofruan vetëm 200 milionë tokenë. 800 milionët e mbetura duhet të jenë në dispozicion për blerje gjatë viteve të ardhshme. Arsyeja kryesore pse të gjitha 1 miliardë tokenët nuk ofrohen për blerje menjëherë është stabiliteti, për të parandaluar rënien e çmimit, edhe pse kjo nuk funksionon shumë mirë.

Kush i blen, kush i zotëron dhe ku shkojnë këto tokenë dhe monedha?
Sipas statistikave të disponueshme në uebfaqen zyrtare, një miliardë tokenë ndahen në tetë grupe. Nga këto tetë grupe deri tani vetëm dy janë në gjendje t’i përdorin ose t’i shesin tokenët e tyre. Pjesa tjetër i zotëron monedhat, por ato janë ende të mbyllura në periudha gjatë 36 muajve të ardhshëm.

Grupi i parë është i gjithë ekipi që ka punuar në këtë projekt dhe e ka krijuar monedhën. Grupi i parë ka marrë 36 përqind ose gjithsej 360 milionë tokenë.

Grupet e mëposhtme janë ekipe më të vogla që kanë ndihmuar në krijimin, ose janë ekipe që në ndonjë mënyrë tjetër kanë ndonjë kontribut në ndërtimin e monedhës meme. Prandaj, në të gjitha grupet mund të bëjnë pjesë në mënyrë specifike një ekip marketingu, promovues, YouTuber-ë, gazetarë, blogerë… Këtu bëjnë pjesë të gjitha grupet nga i dyti deri te i gjashti, të cilët kanë marrë nga 20 milionë deri në 180 milionë, varësisht nga grupi.

Këto grupe janë të mbyllura dhe duhet të kalojë një periudhë e caktuar kohore përpara se të mund t’i përdorin tokenët e tyre. Por, ka dy grupe për të cilët 200 milionë tokenët e parë janë në shitje që nga lëshimi i meme coin-it. Këto janë grupet e likuiditetit dhe të shpërndarjes publike.

Pas 3 muajsh nga lëshimi zyrtar është planifikuar të bëhet zhbllokimi i parë masiv i tokenëve nga grupi i parë. Kur të ndodhë kjo dhe nëse ndodh në treg çdo ditë do të hidhen dhe do mund të blihen 450 mijë tokenë.
Për gjashtë muaj planifikohet të zhbllokohen edhe më shumë monedha dhe në një vit pothuajse të gjitha.

Trump dëshiron të krijojë një rezervë kriptovalutash
Në mars të vitit 2025 Presidenti Trump njoftoi planet e tij për të krijuar një rezervë strategjike të kriptovalutave në SHBA, në mënyrë që ta pozicionojë vendin si “qendër kryesore e kriptovalutave në botë”. Propozohet që rezerva t’i përfshijë kriptovalutat kryesore si Bitcoin. Kjo nismë ngjalli debate në rrjetet sociale dhe në media. Mbështetësit argumentojnë se mund ta legjitimojë sektorin e kriptovalutave dhe t’i diversifikojë mjetet qeveritare, ndërsa kritikët paralajmërojnë për rreziqe të mundshme për shkak të paqëndrueshmërisë së tregut dhe çështjeve etike, veçanërisht në lidhje me konfliktet e mundshme të interesit.

Përfshirja e administratës Trump në tregun e kriptomovalutave ka qenë shënjestër e shumë kritikave. Ekzistojnë gjithashtu shqetësime se këto sipërmarrje të kriptove mund t’i ngjajnë “skemave Ponzi”, duke e zhvendosur pasurinë tek më të pasurit, e njëkohësisht duke minuar besimin publik në sistemet financiare.

/portalb