Tregjet financiare europiane janë goditur rëndë..!?

Tregjet financiare europiane janë goditur rëndë pas vendimit të Kinës për të vendosur një tarifë hakmarrëse prej 34% ndaj mallrave amerikane, si kundërpërgjigje ndaj tarifave të reja të shpallura nga administrata e presidentit Donald Trump. Bursa e Milanos është ndër më të prekurat, me një rënie të përgjithshme prej 7%, ku aksionet e grupeve financiare si Unipol, Unicredit, Bper, Intesa dhe Banca Popolare di Sondrio kanë humbur nga 10% deri në 13% të vlerës së tyre.

Gjermania ka parë gjithashtu rënie të ndjeshme në indeksin DAX, me Deutsche Bank që ka rënë mbi 10%, dhe kompanitë industriale si Daimler, Mercedes-Benz dhe MTU Aero Engines që kanë pësuar humbje nga 5% në 7.5%. Në Francë, Société Générale dhe BNP Paribas janë goditur me rënie përkatësisht prej 10.8% dhe 8.6%, ndërsa gjigandi i automobilave Stellantis dhe kompania e çelikut ArcelorMittal kanë rënë me 8.5% dhe 10%. Në Amsterdam, siguruesi Aegon dhe banka ING kanë pësuar humbje mbi 9%.

Në Mbretërinë e Bashkuar, FTSE 100 ka rënë me 3.46%, me një tendencë që do të përkeqësohet nga momenti në moment. Barclays, NatËest dhe Glencore janë ndër më të prekurat, secila me humbje rreth 10%. Rolls-Royce ka pësuar gjithashtu një rënie prej 8%, ndërsa kompanitë e tjera si InterContinental Hotels, AstraZeneca dhe Rio Tinto kanë ndjerë gjithashtu presionin e tregut. Prodhuesi i armëve Rheinmetall dhe kompania e automobilave Stellantis janë ndër humbësit më të mëdhenj në nivel global.

Krahas panikut në tregje, çmimi i naftës ka rënë me 6%, nga 67 në 62 dollarë për fuçi brenda ditës, duke reflektuar frikën për një ngadalësim të ekonomisë globale. Tregu amerikan pritet të ndjekë të njëjtin trend në momentin që të hapet, me kontratat e së ardhmes që sugjerojnë një rënie prej afërsisht 5%.

/ts