Tramp: Rreziku i madh përfundoi !?

“Mund të shkojmë edhe më tej, dhe do të shkojmë më tej. Por rreziku i madh në atë luftë ka përfunduar prej tre ditësh. Ne i shkatërruam ata që në dy ditët e para”, deklaroi Donald Tramp, President i SHBA-së.

Ndërkaq në një deklaratë për mediat shtetërore, zëvendësministri i Jashtëm iranian, tha se vendi i tij nuk do të hyjë në negociata me administratën e Trampit pa garancinë se sulmet nuk do të përsëriten dhe pa pranimin e përgjegjësisë nga SHBA dhe Izraeli.

“Ata nuk mund të vijnë tek ne dhe të thonë armëpushim, dhe ne të themi në rregull. Ne kemi epërsinë. Planet e tyre kanë dështuar dhe ata nuk i kanë arritur qëllimet e tyre. Irani i ka dëmtuar rëndë Izraelin dhe SHBA-në. Shikoni gjendjen e energjisë globale dhe ekonomisë globale. Ne kemi epërsinë dhe ne do të vendosim se kur do të përfundojë lufta”, deklaroi Kazem Gharibabadi, Zv.ministër për Marrëdhënie Ndërkombëtare.

Ndërkohë zëdhënësi i Gardës Revolucionare, Mohammad Ali Naeini ka paralajmëruar se nuk do të lejojë eksportimin e asnjë litri naftë nga rajoni nëse vazhdojnë sulmet SHBA-Izrael.
Por presidenti i SHBA-së, Donald Tramp, kërcënoi se do ta godasë Iranin “20 herë më fort” nëse ndalon anijet cisternë të naftës në Ngushticën e Hormuzit.

“Vdekja, Zjarri dhe Furia do të mbretëronin mbi ta. Por shpresoj dhe lutem që kjo të mos ndodhë!”, shkroi Trump në Truth Social duke shtuar se kjo do të ishte një dhuratë për Kinën dhe vendet që shfrytëzojnë Ngushticën e Hormuzit.

Çmimi i naftës ra ndjeshëm pasi Tramp, tha se lufta me Iranin do të përfundojë “shumë shpejt”. Çmimi i naftës mbërriti në 120 dollarë për fuçi por komentet e tij çuan në një rënie afër 90 dollarëve për fuçi, edhe pse ende shumë mbi nivelet e para luftës.

/Alsat.mk.