Tramp paralajmëroi NATO-n se e pret një e ardhme e vështirë ?
Donald Trump thotë se nuk e toleron një NATO indiferente ndaj konfliktit me Iranin. Presidenti i SHBA-së e kërcënon aleancën për një të ardhme “shumë të keqe” nëse nuk ndihmon për hapjen e Ngushticës së Hormuzit. Trump i tha Financial Times se vendet që përfitojnë nga kjo rrugë detare duhet të ndihmojnë në sigurimin e saj.
“Është plotësisht e arsyeshme që njerëzit të cilët përfitojnë nga Ngushtica të ndihmojnë për të siguruar që asgjë e keqe të mos ndodhë atje”, deklaroi Donald Tramp, President i SHBA-së.
Bashkimi Evropian do të shqyrtojë opsionet për të mbajtur të hapur Ngushticën e Hormuzit. Shefja e politikës së jashtme të BE-së, Kaja Kallas, tha se BE-ja mund të zgjerojë misionin e saj detar ‘Aspides’, i cili mbron transportin detar në Detin e Kuq, deri në Gjirin Persik.
“Po flitet gjithashtu për një ‘koalicion të të gatshmëve’ në këtë drejtim, por ne gjithashtu duhet të shohim se cila mund të jetë mënyra më e shpejtë për të siguruar hapjen e Ngushticës së Hormuz. Por sigurisht, siç mund ta shihni, kjo nuk është e lehtë”, deklaroi Kaja Kallas, Shefe e Politikës së Jashtme të BE-së.
Edhe kryeministri britanik, Keir Starmer ka biseduar me Trumpin për rëndësinë e rihapjes së Ngushticës së Hormuzit në mënyrë që të mos pengohen furnizimet globale.
“Së pari, ne po punojmë me të tjerët për të hartuar një plan të besueshëm për Ngushticën e Hormuzit, për të garantuar që të mund të rihapim transportin detar dhe kalimin përmes Ngushticës. Më lejoni të jem i qartë, ky nuk do të jetë, dhe kurrë nuk është parashikuar të jetë, një mision i NATO-s. Kjo do të duhet të jetë një aleancë partnerësh, prandaj po punojmë me partnerë si në Evropë, ashtu edhe në Gjirin Persik dhe me SHBA-në”, tha Keir Starmer, Kryeministër i Mbretërisë së Bashkuar.
Ndërkaq Japonia dhe Australia thanë se nuk planifikonin të dërgonin anije në Lindjen e Mesme për të shoqëruar anijet në këtë itinerar kyç detar. Në Ngushticën e Hormuzit qarkullon rreth 20 përqind e sasisë së përgjithshme të naftës që shfrytëzohet nëpër botë.
/Alsat.mk.
